कोइरालापाखें देउवा पक्षयात नापलायेत तकं अस्वीकार

येँ (सन्ध्या टाइम्स)/नेपाली कांग्रेसया सभापति सुशील कोइरालां बरिष्ठ नेता शेरबहादुर देउवा पक्षीय नेतातलिसे खँ ल्हायेत तकं अस्वीकार यानादीगु दु। पार्टीइ जुयाच्वंगु विवाद ज्यंकेत थौं सुथय् कोइराला निवास वंपिं देउवा पक्षया नेतातय्त वय्कलं खँ तकं मल्हासे लित छ्वयादीगु खः। वय्कःलिसे खँ ल्हायेत गोपालमान श्रेष्ठ, खुमबहादुर खड्का, विमलेन्द्र निधि, डा. मिनेन्द्र रिजाल, पूर्णबहादुर खड्का व नारायण खड्का व मध्यमार्गी कथं अर्जुननरसिंह केसी, चन्द्र भण्डारी लगायतया नेतात वंगु खः। तर कोइरालां थः स्वंगू दलया बैठकय् वने मानिगुलिं कन्हय् वा धकाः वय्कःपिंत लित छ्वयादीगु खः। सभापति कोइरालां केन्द्रीय समितिइ बहुमतया आधारय् देउवा पक्षया नेतृत्वय् दुगु नेपाल तरुण दल, महिला संघ व आदिवासी जनजाति संघ नापं मेमेगु भातृ संगठन विघटन यायेवं कांग्रेस दुने विवाद तच्वया वःगु खः। कांग्रेस केन्द्रीय समितिया बैठक कन्हय् सःता तःगुलिं थौं हे वार्ता यानाः समाधान ज्यंकेगु व छुं जुयाः खँ मिले मजुल धाःसा कन्हय्या बैठक बहिष्कार यायेगु ग्वसाः देउवा पक्षं दयेका तःगु दु। कोइरालां नापलायेत अस्वीकार याःगुलिं थौं हे देउवा पक्षया बैठक च्वनाः कन्हय्या बैठक छु यायेगु धकाः निर्णय याइगु खँ धाःगु दु ।