'न्हापां भूमिसुधार या, अले जग्गा लित बी'
येँ (सन्ध्या टाइम्स)/एकीकृत माओवादीया महासचिव रामवहादुर थापा 'बादलं' द्वन्द्वकालय् किसानतय्सं कब्जा यानातःगु जग्गा लित काः वल धाःसा काः वइपिंत लिना छ्वयेगु जुइ धयादीगु दु। संविधानसभां भूमिसुधारया व्यवस्था मयाःतले कब्जा यानातःगु छेँबुँ लित बीगु जुइ मखु धकाः नं वय्कलं स्पष्ट यानादीगु दु। थौं सुथय् विराटनगर विमानस्थलय् पत्रकारतलिसे खँल्हासें वय्कलं पार्टी दुने विवाद व बहस जुइगु स्वाभाविक खः धासें पार्टी अध्यक्ष प्रचण्डं बर्दियाय् बैकल्पिक व्यवस्था यानाः जक छेँबुँ लित बीगु ज्या जुइ धकाः निर्देशन बियादीगु खँ नं स्पष्ट यानादिल ।
अथे हे माओवादीया सचिव सिपी गजुरेलं बाम पार्टीतय्गु दथुइ मोर्चा दयेके माःगु ई वल धयादीगु दु। वय्कलं धयादिल, 'बाम एकताया नितिं मोर्चा माल।' वय्कलं थःगु पार्टी दुने अन्तर्विरोध जुयाच्वंगु स्वाभाविक हे खः धासें मतभेद गबलें क्वय् थ्यंक वनीसा गबलें च्वय्या तहलय् जक जुइ धकाः नं स्पष्ट यानादिल। सुनसरीया धरानय् जुइगु कार्यकर्ता भेलाय् ब्वति कायेत माओवादीया वैद्य पक्षया वय्कः नेतात उखे थ्यंगु खः ।
