कब्जा छेँबुँ लित बीत माओवादीया संकट

क्रान्तिया इलय् माओवादी कार्यकर्तातय्सं सामन्तीया बुँ धकाः कब्जा याना तःगु छेँ व जग्गा आः लित बीगु खँ वःबलय् पार्टीयात समस्या जूगु दु। अज्याःगु छेँबुँ कब्जा यानातःपिं कार्यकर्तातय्सं पार्टीं निर्णय याःसां नं थःपिंसं लित बी मखु धकाः निर्देशनया उल्लंघन यायेवं उमित सम्झे यायेगु लागिं पार्टी अध्यक्ष प्रचण्ड थः हे जिल्ला जिल्लाय् ब्वाँय् जुइमाःगु अवस्था पिहां वःगु दु। छखे कब्जा यानातःगु छेँबुँ लित बी मते धकाः उपाध्यक्षं निर्देशन बीगु, मेखे अज्याःगु छेँबुँ लित बिउ धकाः अध्यक्षं आग्रह यायेगु। थुकिं यानाः माओवादी कार्यकर्तायात अन्यौल जक मखु आक्रोशित नं उलि हे याना बीगु खँय् शंका मदु। क्रान्तिया इलय् छु छु म्हगस म्हंकाः कब्जा याकातःगु छेँबुँ आः छुं हे उपलब्धी चूमलाःनिवं लित बी मालीबलय् कार्यकर्ता तयार मजुइगु स्वाभाविक खः। माओवादीपाखें कब्जा याना तःगु छेँबुँ लित बिउ धकाः जक निर्णय यात, तर वहे छेँबुँइ आश्रित जुयाः च्वनेधुंकूपिं थः कार्यकर्तायात छु यायेगु धइगु बारे चाहिं छुं निर्णय याःगु मदुनि। कब्जा यानातःगु छेँबुँयात थःगु हे थें यानाः च्वनेधुंकूपिं कार्यकर्तायात गय् यानाः पुनर्स्थापना यायेगु खः, उकिया बारे नं पार्टीं छगू निर्णय यायेमाःगु दु। कर्पिनिगु छेँबुँ छुं हे कारणं नं कब्जा यायेगु उचित मखु। छेँबुँ कब्जा याकाः माओवादीं अनुचित हे ज्या याःगु खः। सुयाकें तसकं अप्वः जग्गा दुसा उकियात छगू निश्चित नीति हे दयेकाः राज्यं दुकायेमाः। अज्याःगु स्पष्ट नीति आः तक वःगु मदुनि। थज्याःगु अवस्थाय् कार्यकर्तां कब्जा छेँबुँ त्वःते मखु धाल धाःसा उकिया दोष कार्यकर्तां मखु नेतृत्वं हे कायेमाः ।

More Stories Like this