संगीतय् रीता

शीला साय्मि

झिंस्वदँ न्ह्यः संगीत ख्यलय् पलाः छिनादीम्ह रीता महर्जनया बिचाः दु, संगीत थःके हे दुगु हार्दिकता खः, गुगु थः जागृत जुलकि दना वइ ।

ख नं खः संगीत थः दुने हे दइ, गुकियात खँग्वः दयेकाः बाद्यबादन मार्फत सः तया बिल धाःसा म्येँ जुयाः पिहां वइ ।

परम्पराया भजनंनिसें सुरु जूगु नेपालभाषा संगीत थौं आधुनिक पप म्येँ तक थ्यनेधुंकल। म्येँ हालेगु ब्यक्तिया रहर खःसा उकियात साथ बीत भगवानं सः बियातःगु दइ। म्येँ रिकर्ड यायेबलय् व हालेबलय् शब्द व संगीतं फ्वं कथं थम्हं हाले फत धाःसा थःत तसकं लसता वइ।

सितार स्यनेगु झ्वलय् रीतां पासा रजनी नापलाःगु खः। स्वापू क्वातुया वनेवं रजनीं थम्हं रचना यानागु म्येँ हालेत वय्कःयात इनाप यानादिल। अले अनंनिसें हे सुरु जुल रीताया सांगीतिक यात्रा ।

'सीक सीकं मजिउ धकाः थ्व पलाः बाया वनेमाःगु छाय्?' वय्कलं रजनीया रचना व हरिशरण साय्मिया संगीतय् हालादीगु न्हापांगु म्येँ खः। थ्वयां लिपा वय्कलं मदिक्क हे हालेगु सुरु यानादिल। 'पियाच्वना जिथाय् वइब्यु', 'छं मायां ब्यूगु', 'बुंगद्यः सालायन रे पूच्वं', 'बांलाः मय्जु', 'ख्वख्वं वयाच्वंगु', मतिनाय् जि थें', 'जिगु न्हय:ने जिगु लिउने छं थ्यूगु', आदि वय्कःया तसकं लोकंह्वाःगु म्येँ खः ।

वय्कःया थःगु संगीतय् रेकर्ड जूइधुंकूगु म्येँ नीप्यपु ति दयेधुंकलसा रेकर्ड मजूगुनिगु सच्छिं मल्याक दु। 'हाकु सुपाँय्', 'जिपिं बदमास मखु', 'बांलाः मय्जु', 'इहिपाः', 'गज्याःगज्याःपिं मनू दइ थन', 'मू मदुगु जिन्दगी' आदि नेवाः फिल्मय् नं वय्कलं सः बियादीगु दु।अथे 'हः छहः,' 'पियाच्वना', 'मृत्यु सय्याय् ह्वःगु स्वां', 'मू मदुगु जिन्दगी' व नेपाली भाषाय् 'एकै नजर' वय्कःया पिहां वयेधुंकूगु एल्बम खः। नकतिनि हे वय्कःया 'मां' नांगु मेगु एल्बम नं पिहां वःगु दु ।

अर्थशास्त्रय् बी.ए. यानादीम्ह वय्कलं इलाहाबाद संगीत महाविद्यालयपाखें संगीत विशारद उपाधि कयादीगु दु। वय्कःया गुरुपिं मदुम्ह निल बहादुर चित्रकार व बसन्त उप्रेती खः ।

भजन, गजल, आधुनिक म्येँ, पप आदि आपालं विधाय् म्येँ हालादीम्ह वय्कः २०५६ सालय् मञ्जुश्री महाविद्यालयपाखें जुनियर गायनया डिप्लोय् सर्बोकृष्ट जुयादीगु खः। इमेज म्युजिक एवार्डय् नं वय्कःया म्येँ नोमिनेट जूगु दुसा थ्व बाहेक नेपालभाषाया आपालं संगीत ज्याझ्वलय् वय्कलं म्येँ हालाः सिरपाः व सम्मान कयादीगु दु ।

वय्कःया थ्वहे सांगीतिक योगदानया कदर यासें नेपालभाषा एकेदमिं वय्कःयात दान्यहीरा हःपाः सिरपालं विभुषित याःगु खः। उगु ज्याझ्वलय् नं म्येँ हालाः ज्याझ्वः झःझः धायेकादीगु खः। थौंकन्हय् धाःसा वय्कः छगू संकिपाया निंतिं संगीत सिर्जना यायेगु ज्याय् ब्यस्त जुयादी ।

ने.सं. १०९४ य् मां सीतादेवी व अबु कृष्णहरिया कोखं जन्म जुयादीम्ह वय्कः थःगु हे कुतलं संगीत ख्यलय् पलाः तयादीम्ह खः। फुगुचाःगु ग्वाहालि सकसिनं याना हे च्वंगु दःसां नं संगीतया हरेक समस्यायात वय्कलं छगू हाथ्या व छगू अवसरया रुपय् कायेगु यानादी। खतुं थ्वहे वय्कः सफल जुयादीगुया सूत्र नं खः ।

संगीत वय्कःया साधना खः। लिसें संगीतया हे माध्यमं भाषाया सेवा याये खंगुयात वय्कलं मेगु उपलब्धी तायेकादी। धयादी, 'थःगु भाय्या लागिं संगीतया माध्यमं थम्हं फक्व हे सेवा यानाच्वने ।'

मेमेगु भाय्या सिडी स्वयां नेवाः भाय्या सिडी म्हो जक बिक्री जुइ। थुकिया मू कारण उचित व्यबस्थापनया कमी खः धइगु वय्कःया बिचाः दु। अथे नं म्येँ चीपिंसं गुणस्तरया नाप नापं सन्देशमूलक म्येँ बी फत धाःसा बजाः बांलाकेत नं तिबः जूवनी ला धइगु वय्कःया बिचाः दु ।

More Stories Like this