म्हगसय् वइम्ह छ

म्हगसय् न्ह्याबलें थं वइम्ह छ
ज्वलय् गबलें छुं धइमखुम्ह छ
अय्न जि छंगु हे संसारय् म्वानाच्वना
ज्वलय् जिं छुं यायेमफुसा जिगु च्वसां यानाच्वना ।।

नेतात आपालं मनूतय्गु न्ह्यःने बचं बिइ
न त वं ज्वलय् छुं यानाक्यनि, न त म्हगसय्
उपिं स्वयां ला जि तःधंम्ह हे खः
जिं उमित थनेगु कुतः सदां यानागु खः ।।

लुमन्ति वइ सकसियां थःगु देय्या
चाहे व विदेशय् हे छाय् मजुइमा
सदां थःगु तजिलजि व भाषा थपू यानाच्वनि
छम्ह नेता व सामान्य मनूया थुलिं म्हसीका पानाच्वनि ।।

अय् देय्या माननीय धइपिं नेतात
छाय् यायेमफुत छिमिसं देय्या विकास
ध्वं लायेत जिपिं जन्तु मखु
छिपिं स्वयां जिपिं ज्ञानी व श्रृजनशिल खः ।।

जिगु म्हगसय् जक मखु आः छ
नेतातय्गु म्हगसय् वनाः बाय् काः
जिगु न्ह्यः चफुइत वयेमते छ
उमिगु न्ह्यः चफुइत ताःलायेमाः छ ।।

म्हगसय् न्ह्याबलें थं वइम्ह छ
ज्वलय् गबलें छुं धइमखुम्ह छ
अय्न जि छंगु हे संसारय् म्वानाच्वना
ज्वलय् जिं छुं यायेमफुसा जिगु च्वसां यानाच्वना ।।

More Stories Like this