'राज्य पुनर्संरचना आयोग म्वाः’

विज्ञ पुचःया असफलता लिपा मेगु षडयन्त्र - आयोग

येँ (झीगु स्वनिगः)

एकीकृत नेकपा (माओवादी)या छ्याञ्जे सीपी गजुरेलं आःया अवस्थाय् राज्य पुनर्संरचना आयोग आवश्यक मदु धकाः धयादीगु दु । म्हिगः सोमवाः आदिवासी जनजाति संयुक्त संघर्ष समितिया ग्वसालय् नेवाः—ताम्सालिङ संयुक्त संघर्ष समितिया ग्वसालय् येँ जनजाति भेलाय् न्वंवायेगु झ्वलय् नेता गजुरेलं अथे धयादीगु खः । वय्कलं संविधानसभाया राज्य पुनर्संरचना नापं राज्य शक्ति बाँडफाँट समितिपाखें नेवाः प्रदेश नापं झिंप्यंगू प्रदेशया प्रस्ताव हये धुंकूगु अवस्थाय् आयोगया आवश्यकता मदु धकाः धयादिल । माओवादीया नेता गजुरेलं क्रान्तिया नेतृत्व यानावःगु माओवादी पार्टीं आदिवासी जनजातिया मागप्रति न्ह्याबलें एक्यबद्धता प्वंकेगु जुइ धकाः धयादिल । शान्ति प्रक्रिया धैगु सेना समायोजन जक मखु धयादिसें वय्कलं जनसेनायात नेतृत्वं गुगु कथं अपमान यानाः प्रक्रिया न्ह्याकूगु खँ न्ह्यथसें गणतन्त्र हयेगु नितिं तःधंगु योगदान याःपिं जनसेनायात अपमानजनक कथं आत्मसर्म्पण याकेगु षडयन्त्र याःगु धैगु आदिवासी जनजातिया हक अधिकारया नितिं आन्दोलन याइपिन्त कमजोर यायेगु षडयन्त्रया रुपय् थुइकेमाः धकाः धयादिल । लिपांगु इलय् वयाः माओवादीया नेतृत्वं गलत यानाः वनाच्वंगुलिं थःपिं आःया अवस्थाय् नेतृत्व विरुद्ध हे ल्वानाः च्वनागु दु धकाः नं स्पष्ट यानादिल ।

उगु ज्याझ्वलय् संविधानसभाया सभामुख सुवास चन्द्र नेम्वाङं आदिवासी जनजातिय्सं थःपिनिगु हक अधिकारया नितिं नापं संविधानया नितिं खबरदारी यानाः च्वनेमाः धकाः धयादिल । अदि आःया अवस्थाय् खबरदारी यायेगु ज्या मजुल धाःसा षडयन्त्र जुइफु धकाः नं धयादिल ।

अथे हे एमालेया पोलितब्यूरो दुजः विजय सुब्बां दलया नेतात ब्रम्हुवादीत जक जुयाच्वंगुलिं संघीय गणतन्त्र नेपाः वये धुंकूगु अवस्थाय् नं नेपाःया संविधानया नां संघीय गणतन्त्र धकाः मतःगु खः धकाः स्पष्ट यानादिल । वय्कलं षडयन्त्रपूर्ण कथं हःगु विज्ञ पुचः दयेकेगु ज्या असफल जुइवं आः हाकनं मेगु षडयन्त्रया रुपय् राज्य पुनर्संरचना आयोगया खँ हःगु खः धकाः स्पष्ट यानादिल ।

अथे हे नेपाली कांग्रेसया नेता इन्द्र बहादुर गुरुङं आदिवासी जनजातिया नितिं संसदय् निरन्तर रुपं संघर्ष यायेगु बचं बियादिल । वय्कलं नेपाली कांग्रेसया उपसभापति रामचन्द्र पौडेलं कांग्रेसया सभासदतय्त कारवाही यायेगु ख्याच्वः ब्यूगु खँ न्ह्यथसें कारवाही याइ धकाः ग्यानाः जुयागु मदु धकाः स्पष्ट यानादिल ।

नरेन्द्र कुमालया सभापतित्वय् जूगु उगु ज्याझ्वलय् मल्ल के सुन्दरं लसकुस न्वंचु बियादीगु खःसा जनजाति नेता सुरेश आलेमगरंज्याझ्वः न्ह्याकादीगु खः । माओवादी पोलिटब्युरो दुजः देव गुरुङ्ग नं झायादीगु उगु ज्याझ्वलय् परशुराम तामाङ्गं सुभाय् बियादीगु खः ।