अमेरिकाया नेपाली राजदूतावास नेवाः संस्कृतिया ज्याझ्वः यायेत इच्छुक

सं.रा. अमेरिकाया लागि नेपाःया राजदूत महामहिम डा. शर्मां नेपाःया सरकारी क्यालेन्डरय् नेपाल सम्बतयात छ्यलेगु धकाः नेपाल सरकारं निर्णय याःगु लसताय् अमेरिकाया नेवाः संस्थालिसे जानाः अमेरिकाय् नेवा: संस्कृति पिब्वइगु ज्याझ्वः यायेत इच्छुक जूगु खँ कनादिल । नेवा: अर्गनाईजेशन अफ अमेरिकाया ग्वसालय् संचवाः नेपाल सम्बत ११३२ हने ज्याझ्वः या उलेज्या यानादिसें थुगु खँ कनादीगु खः ।

अमेरिकाया राजधानी वाशिंगटन डि.सी.लिक्क म्यारिल्याण्ड राज्यया सिल्भरस्प्रिंग शहरय् जूगु नेपाल सम्बत ११३२ या ज्याझ्वलय् नेवाः अर्गनाइजेशन अफ अमेरिका (एनओए) या पुलांम्ह नायः त्रिभुवन तुलाधर‌‌ं न्वचु बियादीगु खः ।

ज्याझ्वलय् झायादीपिं पाहांपिन्त पञ्चकन्यां सिन्हः तिकाः लसकुस याःगु खः । उगु ज्याझ्वलय् डा. रोशन श्रेष्ठं विक्रम सम्बत स्वयां झिंन्यासः दँ न्ह्यः हे नेपाल सम्बत न्ह्याना वयाच्वंगु सत्य, तथ्य प्रमाण सहितया पावरप्वाइन्ट प्रिजेन्टेशन यानादीगु खः । एनओएया नायः श्री सिजन श्रेष्ठया लसकुस न्वचुपाखें न्ह्याःगु उगु ज्याझ्वलय् इश्वर राजभण्डारीं एनओए ल्याङ्वेज सेन्टरया प्रगति विवरण न्ह्यब्वयादीगु खः । उगु ज्याझ्वलय् मूपाहां महामहिम राजदुत डा. शंकर प्रसाद शर्मां नेवाः समुदायया पुरोहित बासभ राजोपाध्याय व नेपालभाषा एकेदमीका सचिब इन्द्र बहादुर मालीयात हनादीगु खः ।

ज्याझ्वलय् नांजाःपिं कलाकारपिं, सरिश्मा अमात्य, संजिव प्रधान, समिर मानन्धर, नीभा, लसता, सक्ची तुलाधर, सुनिल चौधरी, शशी दाहाल, रबिन मानन्धर, बिश्वोम्भर प्रधान, निलिमा मानन्धर, सुशील लाल श्रेष्ठ, श्रेयस्का दाहाल, श्रीस्तिका दाहाल, रुबी श्रेष्ठ, रोषी श्रेष्ठ, समी मानन्धर, ज्वोयल रंजित, मोनीक्यु राजभण्डारी, बरदान तुलाधर लिसें एनओएया पुलांम्ह नायः राजेश श्रेष्ठ, यज्ञमान शाक्यपिन्सं नेवाः म्ये व सांस्कृतिक ज्याझ्वः न्ह्यब्वयादीगु खः ।

ज्याझ्वलय् नच्चाम्ह भाजु जोयल रञ्जितं नेवाः भासं यानादीगु न्वचुं सकसिया ध्यान साःगु खः । अथे हे जस्मीन श्रेष्ठं अंग्रेजी भासं बियादीगु न्वचुयात नं स्वकुमिपिन्सं ययेकूगु खनेदत । ज्याझ्वलय् न्ववानादीपिं सकसिनं हे नेवाः व अंग्रेजी भासं जक न्ववानादीगु खः । पुष्कर प्रजापति व बबिता श्रेष्ठं न्ह्याकादीगु उगु ज्याझ्वलय् एनओएया न्वकु रबि प्रधानं सुभाय् देछानादीगु खः । ज्याझ्वलय् दक्कले अन्तय् सम्हय् बजि सहितया नेवाः तुच्चां पाहांपिन्त लसकुस याःगु खः ।

More Stories Like this