भद्रकाली माइतीघर सतक चायेकेगु खँय्

नरेन्द्रमान श्रेष्ठ 'गोंगजु'
नेपाली सेना, नेपाःया सेना धाल कि वीरता व साहसी सेना कथं म्हसिउ। थज्याःगु सेनायात थःगु हेडक्वाटरया सुरक्षा यायेत उलि थाकु जुइगु खने मदु। भद्रकाली�माइतीघरया सतक चायेकेवं आर्मी हेडक्वाटरयात असुरक्षा जुइ धइगु नं मदु थें च्वं।

येँया भद्रकाली�माइतीघर सतक चायेकगु खँय् कचवं पिहां वःगु दु। थ्व सतक चायेकेत प्रधानमन्त्री डा. बाबुराम भट्टराईं उजं बीवं थुकी नेपाली सेना, ट्राफिक प्रहरी व सरकारया दथुइ कचवं पिहां वःगु खः। थ्व सतक चायेकेत उजं बी न्ह्यः सरकारं सेना व ट्राफिक प्रहरीया दथुइ छुं कथंया खँल्हाबल्हा व सरसल्लाह मजूगु खने दत। तर न्ह्यागु हे जूसां थ्व सतक चाल कि सर्वसाधारण मनूतय्त भतिचा जूसां सुविधा जुइ।
येँया अझ धायेगु खःसा स्वनिगःया ट्राफिक जामया समस्या झन झन तच्वयाच्वंगु दु। सायद, भद्रकाली�माइतीघर स्वाःगु थ्व लँ चायेकल धाःसा व लागाया ट्राफिक जामया समस्या छुं भचा म्हो जुइ धकाः सरकार व ट्राफिक प्रहरी भद्रकाली�माइतीघरया सतक चायेकेगु पक्षय् दु तर नेपाली सेना धाःसा थ्व सतक चायेकेगु पक्षय् मदु। सेना, सेनाया हेडक्वाटरया सुरक्षाया लागि थ्व सतक चायेकेगु पक्षय् मदु। अथे जूसां नं अधिकांश सर्वसाधारण धाःसा थ्व सतक चायेकेमाः धाइपिं हे दु। थौंकन्हय् येँया थीथी थासय् ट्राफिक जामया समस्या अप्वयाच्वंगु दु। थुकिया झ्वलय् यदि थ्व सतक चाल धाःसा व लागाया ट्राफिक जामया समस्या छुं भचा जूसां म्हो जुइ अले शहिद गेट, भद्रकाली�माइतिघर, थापाथली इरूथिरू जुइपिं लँजुवाः, सवारी साधनया यात्रुतय्त नं छुं भचा जक जूसां सुविधा जुइगु खनेदु लिसें ई नं बचत जुइगु खनेदु। अथे जूगुलिं अधिकांश सर्वसाधारण थ्व सतक चायेकेमाः धइगु पक्षय् दु। खय्त ला थ्व सतक चालेवं हे येँया ट्राफिक जामया समस्या ज्यनीगु वा समाधान जुइगु धाःसा मखु। तर सिंहदरबार, माइतिघर, थापाथली, भद्रकाली, शहिद गेटया ट्राफिक जामयात धाःसा छुं भचा म्हो अवश्य नं याइ।
येँया स्वनिगःया ट्राफिक जामया समस्या न्हियान्हिथं अप्वयाच्वंगु दु। थुकिया कारण धइगु हे स्वनिगलय् अप्वयाच्वंगु जनसंख्याया चाप खः। स्वनिगलय् नेपाःया थीथी थासं जक मखुसें जःलाखःला देशं तक नं मनूत बसोबास यानाच्वंगु दु। वास्तवय् धायेगु खःसा स्वनिगलय् अप्वयाच्वंगु जनसंख्याया चाप स्वनिगलं फये मफइगु अवस्थाय् थ्यनेधुंकल धाःसां छुं पाइ मखु। अले गन जनसंख्याया चाप अप्वः दइ अन सवारी साधनया संख्या नं अप्वइगु ला स्वाभाविक हे जुल। अले सवारी साधनया अनुपातय् सतकया व्यवस्था मजुल धाःसा ट्राफिक जामया समस्या अप्वइगु नं स्वाभाविक हे जुल नि। स्वनिगलय् अप्वयाच्वंगु जनसंख्याया चाप व अप्वयाच्वंगु सवारी साधनं यानाः स्वनिगःया थीथी थासय् ट्राफिक जामया समस्या सर्वसाधारणं फये मालाच्वंगु दु। स्वनिगःया सतक, गल्लिगल्लिइ तकं ट्राफिक जामया समस्यां यानाः, सवारी साधनया जक मखु लँजुवाःतय्त तकं इलय् थःगु गन्तव्यय् थ्यंके फयाच्वंगु मदु। सर्वसाधारणं धाःसा न्हियान्हिथं थीथी थासय् ट्राफिक जामया समस्या फये मालाच्वंगु दु अले दुगु सतकयात बन्द याना तयेगु नं पाय्छि मजू। भद्रकाली�माइतीघर सतक चायेकेगु थौंया आवश्यकता नं खः धाःसां जिउ।
भद्रकाली�माइतीघर सतक बन्द जूगु न्हापांनिसें परापूर्व कालंनिसें मखु। थ्व लँ बन्द जूगु छगू दशक तिनि दत। थ्व स्वयां न्ह्यः थ्व सतक सर्वसाधारणया लागी निर्वाध रुपं चले जुयाच्वंगु सतक खः। थ्व तसक झिदँ न्ह्यः माओवादी द्वन्द्वया इलय् सुरक्षाया कारण क्यनाः सेनां सर्वसाधारणतय्गु लागिं बन्द याःगु खः। आः माओवादी द्वन्द्व नं बन्द जुइधुंकूगु दु। आः ला झन माओवादी नेतृत्वया सरकार खः। थौंकन्हय् शान्ति सम्झौताया प्रक्रिया नं पूवनीगु अवस्था वयाच्वंगु दु। आः नं सुरक्षाया कारण क्यनाः सतक बन्द याना तयेगु अवस्था थें मच्वं। खय्त ला सेनां थःगु हेडक्वाटर सुरक्षाया लागिं चिउताः कायेगु स्वाभाविक खः। थुकी सेनां जक मखु सर्वसाधारणया नं उलि हे चिउताः दयेमाः, थुकी निगू मत मदु। यदि सर्वसाधारणया लागि छुं भचा सुविधा जुइगु खःसा सेनां नं थुकी उदारता क्यनाः सुरक्षाया विकल्प मालाः जूसां थ्व सतक चायेकेगु यात धाःसा बांलाः जुइ।
नेपाली सेना, नेपाःया सेना धाल कि वीरता व साहसी सेना कथं म्हसिउ। थज्याःगु सेनायात थःगु हेडक्वाटरया सुरक्षा यायेत उलि थाकु जुइगु खने मदु। भद्रकाली�माइतीघरया सतक चायेकेवं आर्मी हेडक्वाटरयात असुरक्षा जुइ धइगु नं मदु थें च्वं। यदि सुरक्षाया हिसाबं नं बिचाः यायेमाःगु अवस्था वल धाःसा निश्चित समय व सीमा तोके यानाः सुथय् ७/८ बजेनिसें बहनी ६/७ बजेतक जक सतक सर्वसाधारणया लागी चायेकेगु व हलुका सवारी साधन गथे कि साइकल, मोटरसाइकल, कार, टेम्पो, भ्यान, माइक्रो बस आदिया निंतिं जक सतक चायेकेगु ज्या जुल धाःसा सर्वसाधारण लँजुवाःतय्गु लागिं छुं भचा जूसां राहत जुइ। थापाथली, माइतीघर, सिंहदरबार, भद्रकाली, सहिद गेट लागाय् छुं भचा ट्राफिक जामया समस्या म्हो जुइगु सम्भावना दु। थुकिया लिसें सवारी साधन व लँजुवाःतय्गु छुं भचा ई नं म्हं चाइगु सम्भावना दु। अथे हे सवारी साधनय् छ्यलीगु अमूल्य इन्धनया छ्यलाबुला नं छुं मात्राय् म्हो जुइगु सम्भावना दु। गुकिं यानाः न्ह्याक्व भाः थकाःसां लछिया करोडौं तका घाटाय् वनाच्वंगु नेपाल आयल निगमया घाटा नं छुं भचा म्हो जुइगु सम्भावना दु।

More Stories Like this