पूर्व लडाकुयात पुनर्स्थापनाया समस्या

देय्न्यंकंया थीथी शिविरय् च्वनाच्वंपिं माओवादीया पूर्व लडाकुतय् पुनर्वर्गीकरण ज्या न्ह्यानाच्वंगु दु। थुकी लडाकुतय्त स्वंगू वर्गय् तयेगु ज्या जुइसेनाय् समायोजन, सीपमुलक तालिम सहित पुनर्स्थापना व स्वेच्छिक अवकास। थ्व स्वंगू मध्ये आपालं लडाकुतय्सं सेनाय् समायोजनयात थःगु न्हापांगु छनौट दयेकूगु दुसा स्वेच्छिक अवकासयात निगूगु छनौटय् लाकूगु दु। सीपमुलक तालिम सहितया पुनर्स्थापनायात सुनां हे ययेकूगु खने मंत। थथे जूगुया मू कारण समाजय् उपिं हानं पुनर्स्थापित जुइगु ज्याय् खने दुगु सामाजिक समस्या खः। राज्यं बीगु तालिम कयाः शिविरं पिहां वंसां उमित रोजगारी बीगु लागिं सुं नं तयार मदु। छेँय् लिहां वने धाःसा जःलाखःलां सह याइगु अवस्था मदु। वर्तमान सरकारय् नियुक्त जूपिं छुं मन्त्रीतय्त हत्यारा, अपहरणकारी आदि आदि धइगु द्वपं बियाः पुलांगु खँ ल्ह्वनाः कायल यायेत स्वयाच्वंगु खनाच्वंगु हे खँ जुल। थज्याःगु अवस्थाय् माओवादी लडाकुत समाजय् हानं पुनर्स्थापित जुइत थाकुइगु निश्चित दु। उमित समाजं प्रतिशोधया मिखां स्वयेफुगु नं उतिकं हे सम्भावना दु। थ्व छगू स्वाभाविक खँ खःसां जुइ मजिउगु विषय नं खः। यदि शिविरं पिहां वःपिं लडाकुतय्त समाजं उकथं हे हेय व प्रतिशोधपूर्ण व्यवहार यात धाःसा लडाकुतय्सं हानं मेगु कथंया जीवन म्वायेगु लँपु लिउ वनेफु। वास्तवय् अय् जुयाः हे माओवादी लडाकुतपाखें भविष्यय् नं छुं कथंया खतरा मवयेकेगु खःसा उपिं फुकसित हे सेनाय् समायोजन यानाः अनुशासनय् तयेगु ज्या जुइमाः धाःगु खः। तर मजुल। थुकिं आःया समस्या समाधान जूसां भविष्यय् हानं अशान्ति ब्वलंकेफु।

More Stories Like this