ज्ञानमाला भजन खलःया रसुवा तातोपानी यात्रा

येँ(सन्ध्या टाइम्स)/ज्ञानमाला भजन खलः स्वयम्भूया रसुवा तातोपानी यात्रा वंगु २९ गते क्वचाल। कार्तिक २५ गते २९ म्ह भक्तजनपिं लिसें न्ह्याःगु उगु यात्राया झ्वलय् भजन खलः भजन यायां स्यार्पुबेसी, चिलिमे थ्यंगु खः।
२६ गते सुथय् चिलिमें न्ह्याःगु उगु यात्रा सुथय् १० बजे तातोपानी थ्यंगु खःसा अन थ्यंकाः भक्तजनपिंसं म्वः ल्हुयाः थःपिंत शुद्ध यासें ज्या न्ह्याकूगु खः। तातोपानीइ म्वः ल्हुल कि बाथ,ग्यास्ट्रिक, एलर्जी आदि ल्वय् लनी धइगु जनविश्वास दु।
अथे हे २७ गते सुथंनिसें घौछि भजन यानाः बुद्ध पुजाया ज्याझ्वः नं न्ह्याकूगु खः। उगु बुद्ध पुजाय् भाजु पुष्पमान डंगोलं थःगु बिचाः प्वंकादीगु खःसा मय्जु सूर्यशोभां बाखं कनादीगु खः। पुण्य शाक्यं सुभाय् बियादीगु उगु बुद्ध पुजा क्वचायेकाः वंगु कार्तिक २९ गते भजन पुचः येँय् लिहां वःगु खः। ज्ञानमाला प्रचारया ल्याखं भ्रमण ताःलाःगु खँ धाःगु दु।