प्रम खनाः सहिद व घाइते परिवार तम्वल
येँ (सन्ध्या टाइम्स)/सहिद परिवार नापं जनआन्दोलनय् घाःपाः जूपिंलिसे तःक्वःमछि याःगु सम्झौता कार्यान्वयन यायेमाःगु माग यासें थौं सहिद परिवार व जनआन्दोलनय् घाःपाः जूपिनिगु संयुक्त संघर्ष समितिया आह्वानय् वालुवाटारय् धर्ना बीगु ज्या जुल ।
उमिसं वालुवाटार पिने स्वघौ धर्ना च्वंगु खः। धर्ना च्वने न्ह्यः हे प्रधानमन्त्री डा. बाबुराम भट्टराई पिहां वंगुलिं उमिसं थुकिया नं विरोध याःगु दु। थःपिनिगु खँ न्यनेत प्रधानमन्त्रीं नापलाः वइ धकाः आशा यानागु जूसां वय्कः सुथ न्हापां हे पिहां वन धासें सहिद व घाःपाः जूपिनिगु परिवारया दुजःतय्सं थुकिं थःपिंत अपमान यायेगु ज्या जुल धकाः आक्रोश प्वंकूगु दु ।
ऐतिहासिक जनआन्दोलन २०६२/०६३ या सहिद परिवार व घाःपाः जूपिं जानाः स्वनातःगु सरोकार समितिया अध्यक्ष मेघराज आचार्यं मुलुकय् राजनीतिक हिउपाः हयेत महत्वपूर्ण भूमिका म्हितेगु झ्वलय् घाःपाः जूपिं नापं सहिद जूपिं परिवारयात प्रधानमन्त्रीं ई मबिउगु धइगु उमित अपमान याःगु खः धयादिल ।
सीपिंत सहिद घोषणा व घाःपाः जूपिंत माःगु व्यवस्थापन यायेत आयोग गठन यायेमाःगु, राजनीतिक नियुक्तिइ सहिद परिवार व घाःपाः जूपिनि प्रतिनिधित्व जुइमाःगु, दीर्घकालीन सेवा सुविधा बीमाःगु, राहत बीमाःगु, वासः खर्चया व्यवस्था यायेमाःगु नापं थीथी कथंया माग तयाः उपिं वालुवाटारय् धर्ना च्वंगु खः ।
उगु संघर्ष समितिं वंगु मंसीर १ निसें ४ गते तक थीथी राजनीतिक दल नापं संघ संस्थातलिसे परामर्श याःगु खः। इमिसं कन्हय् माइतीघर मण्डलाय् १ घण्टा चक्का जाम यायेगु ज्याझ्वः दयेकातःगु दु ।
