सरकार दुने हे आयोग विवाद
आयोगया औचित्ययात कयाः मधेसी मोर्चापाखें न्ह्यसः
येँ (सन्ध्या टाइम्स)/राज्य पुनर्संरचना आयोग दयेकेगु खँयात कयाः सरकार दुने हे कचवं पिहां वःगु दु। आः गठन जुइगु आयोगया अध्यक्ष सु जुइ धकाः विवाद पिहां वयाच्वंगु इलय् लाक्क सत्तारुढ दल मध्ये छगू घटक जुयाच्वंगु मधेसी जनअधिकार फोरम (गणतान्त्रिक) पाखें आयोगया औचित्यय् हे न्ह्यसः थना बीवं थुकिया बारे हानं मेगु कथंय विवाद सिर्जना जूगु खः ।
आयोग गठन यायेगु लागिं सहलह यायेत थौं सुथय् च्वंगु सत्तारुढ दलतय् बैठकय् मधेसी मोर्चा दुने दुथ्याःगु छगू घटक गणतान्त्रिक फोरमं थ्व आयोग छाय् गठन याये माःगु खः व थुकिया औचित्य छु धकाः न्ह्यसः तयेवं बैठक तकं न्ह्यःने न्ह्याये मफुगु खः। मधेसी मोर्चापाखें सुथय् मधेसी मोर्चाया कारणं न्ह्याये मफुगु बैठक आः थौं हे सनिलय् हानं च्वनीगु जूगु दु। उकिया तयारी कथं थौं न्हिनय् सिंहदरवारय् सत्तारुढ दलतय् दथुइ बैठक नं च्वंगु दु ।
उखे आयोगया अध्यक्ष सुयात दयेकेगु धइगु खँयात कयाः माओवादी नापं एमाले व कांग्रेस दथुइ तकं विवाद जुयाच्वंगु दु। कांग्रेसं अध्यक्ष पदया लागिं त्रिविविया पुलांम्ह भिसी केदारभक्त माथेमा व पुलांम्ह मुख्य सचिव तीर्थमान शाक्यया नां प्रस्तावित यानाच्वंगु दु। अथे हे एमालेपाखें डा. पीताम्बर शर्मा व डा. गणेशमान गुरुङया नां प्रस्तावित यानाच्वंगु दु ।
माओवादीपाखें धाःसा थःपिंसं तुं छुं नां मबिसे एमाले व कांग्रेसं बिउगु नांयात कयाः सहलह यानाच्वंगु दनि। सूत्रतय्सं धाः कथं प्रधानमन्त्री डा. बाबुराम भट्टराई मेपिं स्वयां नं डा. पिताम्बर शर्माया नामय् अप्वः इच्छुक जुयादीगु दु। भूगोलया बारे डा. शर्मां यक्वं ज्या यानादीधुंकूगु दु। थःत डा. हर्क गुरुङ्गया शिष्य खः धायेके यःम्ह डा. शर्मा आः निर्माण जुइगु संघीय व्यवस्थाया आपालं आधार जातीय जूसां प्रदेशतय् नां जातिया नामं तये मजिउ व आत्मनिर्णयया अधिकार नं बी मजिउ धइगु बिचाःयाम्ह खः ।
राज्य पुनर्संरचना आयोग न्हय्म्ह सदस्यीय दयेकेगु ग्वसाः जुयाच्वंगु दु। आयोगया छम्ह दुजलय् नेवाः समुदायपाखें नं मनोनित यायेगु बारे खँ जुयाच्वंगु सूत्रं धाःगु दु। तर उकिया लागिं नां धाःसा क्वःछिउगु मदुनि ।
आः गठन जुइगु आयोगं निला दुने थःपिनि प्रतिवेदन बीमाः धकाः धयाच्वंगु दु। तर आयोगया अध्यक्ष जुइपिं धकाः नां चर्चाय् वयाच्वंपिं विज्ञतय्सं धाःसा निलाया दुने ज्या सिधयेके फइ मखु धकाः आः हे धायेगु याना हयेधुंकूगु दु। लिसें आयोगयात म्होचा जक अधिकार बिल धाःसा ज्या याये मखु धकाः नं उमिसं धयाच्वंगु दु ।
