'संविधानसभायात हाथ्या : राज्य पुनर्संरचना आयोग’

येँ (झीगु स्वनिगः)

मधेसी जनअधिकार फोरमया नायः उपेन्द्र यादवं राज्य पुनर्संरचना आयोग गठन धैगु दुर्भाग्यपूर्ण खः धकाः धयादीगु दु । वय्कलं लिपांगु इलय् वयाः राज्य पुनर्सरचना व संघीयता विरुद्ध तःधंगु षड्यन्त्र जुल धकाः दावी यानादिल । नेता यादवं मधेशी व जनजातितय्गु पहिचान सहितया संघीयताया माग यात उपेक्षा यानाः अथे राज्य पुनर्संरचना आयोग व विज्ञ पुचः दयेकेगु षड्यन्त्र याःगु दावी यानादिल ।
वय्कलं संविधानसभाया औचित्ययात हाथ्याबिसें राज्य पुनर्संरचना आयोग गठन यायेगु निर्णय तःतःधंगु दलया नेतातय्सं याःगु दुर्भाग्यपूर्ण खः धकाः धयादिल ।

म्हिगः आइतवाः बुटवलय् ग्वसाःग्वःगु छगू साक्षात्कार ज्याझ्वलय् न्वंवायेगु झ्वलय् मधेसी नेता यादवं मधेसी जनताया मागयात उपेक्षा यानाः राज्य पुनर्संरचना आयोग गठन यायेगु निर्णययात कयाः आपत्ति प्वंकादीगु खः । न्हापा विरोध यानाः वयाच्वंगु मधेसवादी दलतपाखें लिपांगु इलय् वयाः राज्य पुनर्संरचना आयोग गठन यायेगु नितिं सहमत जूगु धैगु रहस्यपूर्ण जू धकाः तकं धयादिल ।
वय्कलं जनजाति व मधेसी जनताया पहिचान सहितया संघीयताया भावनायात सम्वोधन मयात धाःसा हाकनं मेगु विद्रोह जुइ धकाः ख्याच्वः नं बियादिल । वर्तमान सरकार असफल जुइ धुंकूगु दावी यानादिसें मधेसी जनअधिकार फोरमाया नायः यादवं राष्ट्रिय सहमतिया सरकार गठन जुइमाःगु खँय् बहः बियादिल । आःया अवस्थाय् औतित्यया आधारय्सिबें नं खुशी यायेगु उद्धेश्यं मन्त्री मण्डलया आकार तःधं यानाः इतिहासय् हे दक्ले तःधंगु मन्त्री मण्डल दयेकल धकाः धयादिल ।