'पुनर्संरचना समितिया आधारय् आयोग जुइमाः’

थौं दलतपाखें मुँज्या च्वनाः क्वःछिइगु

येँ (झीगु स्वनिगः)

संविधानसभाया प्रमुख स्वंगू दल नापं मधेसी मोर्चाया दथुइ लिपांगु इलय् सहमति जूगु कथं राज्य पुनर्संरचना आयोग दयेकेगु ज्या थौं सोमवाः याइगु जूगु दु । उकिया नितिं म्हिगः आइतवाः स्वंगू दलया शीर्ष नेतातय्गु मुँज्या च्वंगु खःसा थौं उकिया अन्तिम निर्णय यायेगु धकाः सहमति याःगु दु । सहमति कथं प्रमुख स्वंगू दल नापं मधेसी मोर्चापाखें राज्य पुनर्संरचना आयोगय् च्वनीपिं मनूतय्गु नां तकं प्रस्ताव याइगु जूगु दु । सूत्रं धाः कथं एकीकृत नेकपा -माओवादी), नेपाली कांग्रेस व एमालेपाखें निम्ह—निम्ह अले मधेसी मोर्चापाखें छम्ह यानाः न्हय्म्हेसिया राज्य पुनर्संरचना आयोग दयेकी । आयोगया नेतृत्व सुनां याइ धैगु खँय् धाःसा सहमति जुइ फयाच्वंगु मदु ।

संभवतः थौं हे उकिया नं सहमति याइ । राज्य पुनर्संरचना आयोग स्वन्हुया दुने दयेकेगु धकाः दलतय्गु दथुइ वंगु शुक्रवाः चान्हय् सहमति जूगु खः । उकिं थौं हे आयोगया कार्यदेशंनिसें आयोगया दुजःतय्गु नं खँ क्वःछिइ धाःगु दु । थ्व हे दथुइ संविधानसभाया राज्य पुनर्संरचना नापं राज्य शक्ति बाँडफाँट समितिपाखें बहुमतं पारित याःगु नेवाः प्रदेश नापं १४ प्रदेशया प्रस्तावया आधारय् च्वनाः जक राज्य पुनर्संरचना आयोगं प्राविधिक पक्षयात स्वयेगु अधिकार बिइमाः, राज्य पुनर्संरचना समितिया प्रस्तावयात हे गोलमाल यायेगु कथंया अधिकार आयोगयात बिल धाःसा उकियात थःपिन्सं स्वीकार याये फैमखु धकाः आदिवासी जनजाति सभासद् दबाव समूह -ककस)ं या नेतात नाप नापं एकीकृत माओवादीया बरिष्ठ उपाध्यक्ष मोहन बैद्य किरण पक्षधरया नेतातय्सं धयादीगु दु । थःपिनिगु मागयात बेवास्ता यानाः हाकनं षडयन्त्र यायेत स्वल धाःसा संघर्ष यायेगु जुइ धकाः ख्याच्वः तकं बियादीगु दु ।

उगु हे कथं राज्य पुनर्संरचना आयोगय् फुक्क दलपाखें पहिचानया आधारय् राज्य पुनर्संरचनायात स्वीकार याइपिं मनूतय्त छ्वयेमाः धकाः दलया आदिवासी जनजाति नेतातय्सं दबाव बिइगु ज्या तिब्र रुपं न्ह्याकूगु दु । अथे आयोगय् छ्वयेगु नितिं दलया नेतातय्सं नं थःथःगु पार्टीया कार्यकर्ता नापं नेतातलिसे सहलह तिब्र रुपं न्ह्याकूगु दु । थौं सोमवाः सुथय् च्वनीगु स्वंगू दल नापं मधेसी मोर्चाया मंकाः मुँज्यां गुगु कथं आयोग दयेकी नापं आयोगयात क्षेत्राधिकार गुलि बिइ उकिया आधारय् जक थःपिं न्ह्याः वनेगु जुइ धकाः छम्ह जनजाति सभासद् जानकारी बियादीगु दु । लिपांगु इलय् आदिवासी जनजाति सभासदत नापं माओवादीया बरिष्ठ न्वकु किरण पक्षधरया सभासद् व नेतातय्सं राज्य पुनर्संरचनाया सवालय् म्हितूगु भूमिकां यानाः आदिवासी जनजाति सभासद्, नेता नापं कार्यकर्तात उत्साहीत जूगु दु ।