भाषाथुवा: पुष्परत्न
नेपालभाषा व्याकरणविद्, प्रेस व्यवसायया न्ह्यलुवा व पुलांम्ह ल्हासा नेवा: व्यापारी पुष्परत्न 'सागर' (तुलाधर) वंगु शनिवा: मंत । ता:र्इ न्ह्यवंनिसें उसाँय् मदयाच्वंम्ह वय्क: ९० दँ दुम्ह ख: ।
ने.सं. १०४२ सालय् असं धालसिक्वय् बूम्ह वय्क: ल्हासा व्यापारया झ्वलय् खुदँ तक ल्हासाय् च्वनादीगु ख:सा व स्वयां न्ह्य: त:दँ भारतया कलकत्ताय् च्वनादीगु ख: । ल्हासां ने.सं. १०७० सालय् नेपा: लिहां वया: मेपिं ल्हासा नेवा: पासापिं लिसे जाना: नेपाल प्रेस चायेकूगु ख: । नेपालभाषाया न्हापांगु लय्पौ 'थौंकन्हे'या वय्क: उपसम्पादक ख:सा वय्कलं 'सुवोध नेपालभाषा ब्याकरण', 'नेपालभाषाया मौलिक शव्दकोष' सफू च्वयादीगु दु । वय्कलं नेपाल लिपिया लेटर प्रेस आख: व टाइप राइटर नं दयेकादीगु ख: ।
नेपालभाषा परिषद्पाखें नेसं १०७७ य् वय्क:यात 'भाषाथुवा:' उपाधिं विभुषित या:गु ख: । वाणिज्यया ख्यलय् वय्कलं नेपाली वाणिज्य संघ ल्हासाया कान्तिपुर कचाया छ्याञ्जे जुया: नं ज्या यानादीगु ख: ।
News Location:
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान जागरणया न्हापांगु अधिवेशन वेश्यायात बेकमया मुद्दा
