हिसिला व भिंतुनाया पुनारागमन, धिरेन शाक्य नं नेवा: संकिपाय्

नेपालभाषा संकिपा ख्यलय्‍ विस्कं हे महत्वं जा:गु संकिपा 'राजमति'या राजमति हिसिला महर्जन संकिपा ख्यलं पिने च्वना च्वंगु ता: र्इ दये धुंकल । लिपा वया छपुनिपु म्युजिक भिडियोलय्‍ जक खने दयाच्वंम्ह थुम्ह हिसिं बिलिबिलि जा:म्ह नकिं मय्‍जु संकिपा: स्वया: तापानाच्वंगु ख: । बीरेन्द्र ताम्रकारया 'त्याग'पाखें वय्‍कलं थ:गु अभिनय पला: हाकन न्ह्‍याकूगु दु । थ्व नेवा: संकिपाया नितिं लसताया खँ ख: ।

नेपालभाषा संकिपा ख्यलय् मेम्ह लोकह्‍वा:म्ह नकि भिन्तुना जोशी नं दच्छि निदँया आराम लिपा त्याग संकिपां हे थुगु ख्यलय्‍ पुनरागमण यानादीगु दु ।

थुलि जक मखु नेपा:या मूलधार (खँय् भाय्)या संकिपाया लोकंह्‍वा:म्ह नाय:कथं स्थापित जुइ धुकूम्ह धिरेन शाक्य नं 'त्याग' संकिपा पाखे नेपालभाषाय् दुहां झायादीगु दु व नं नाय:या भुमिकाय् हे । थ्व नं संकिपा ख्य:या निति लसताया हे खँ ख: । थुकथं त्याग संकिपापाखे बीरेन्द्र ताम्रकारं निम्ह नकिंपिन्त संकिपा ख्यलय् लित ब्वना हयेत ता:ला:गु दु धा:सा नेपा:या छम्ह राष्टि्रय नाय: धीरेन शाक्ययात न्हापांखुसि नेपालभाषा संकिपाय् म्हितकादीगु दु ।

खय्‍तला थ्वयां न्ह्‍य: धिरेन शाक्ययात सुरेन्द्र तुलाधरया 'छंगु नामय् संकिपाय् अनुवन्ध याना: वंगु दँया भाद्र २४ गते भिं साइत याये धुंकूगु ख: । तर 'छंगु नामय्‍' सुटिङ जूगु मदुनि उकिं धीरेन शाक्ययात नेपालभाषा संकिपाय् नाय:या भुमिकाय् म्हितकादीम्ह न्हापाम्ह निदर्ेशक बीरेन्द्र ताम्रकार हे जुयादीगु दु । 'त्याग' संकिपा मतिनाया वाखनय्‍ दयेके ज्या जुयाच्वंगु संकिपा ख: ।

थुगु संकिपाय्‍ बिजुली नामं लोकंह्‍वाम्ह कलाकार मञ्जु श्रेष्ठ, सुशील राजोपाध्याय नापं गैरनेवा: कलाकार लक्ष्मी गिरीं नं अभिनय यानाच्वनादीगु दु । गैर नेवा: कलाकारपिस ममेगु संकिपाय् नं अभिनय यानादीगु दु । तर थुगु संकिपाया म्हितेत लक्ष्मी गिरी गुकथं नुग: उला: भिं साइत ज्याझ्‍वलय्‍ खँ तयादिल । व न सकारात्मक पक्ष ख: । वय्‍कलं थ:पिन्त नेवा: संकिपा ख्यलं ब्यूगु थाय्‍यात कया: लसता प्वंकादीगु ख: ।

नेपालभाषा संकिपा ख्यलय् थुकथं नांजा:पिं कलाकारपिं कया: संकिपा दयेके ज्या म्ह्‍व: जक जूगु खनेदु । बीरेन्द्र ताम्रकारं 'त्याग' संकिपाय् नाजा:पिं कलाकारपिन्त ज्या याकादीगु दु । थ्व जक मखु थुगु संकिपां तय्‍ज्जु या: व:पिं नकिंपिं भिंतुना व हिसिला नं ख: अले नेवा: संकिपा म्हितेत लालायित जुयाच्वंम्ह नाय: धीरेन शाक्य 'त्याग' म्हिता: थ:गु इच्छा नं पूवंकादीगु दु । थुकथं न्यकभनं विचा: याना स्वयेबलय त्याग नेवा: संकिपाया निति लुमंकेबह:गु संकिपा जुइफु । 'इहिपा' क्यनीगु हेमा फिल्मस्‍या ब्यानरय्‍ दयेकेज्या जूगु नेपालभाषा संकिपा इहिपा वइगु मंसिर १७ शनिवा: राष्टि्रय नाचघरय् क्यनीगु जूगु दु । इहिपा संकिपाया निदर्ेशन व सम्पादनया ज्या सुरेश बज्राचार्यं यानादीगु ख: । थ्वया: न्ह्‍य: वय्‍कलं 'मतिनाया कलि' संकिपा नं निदर्ेशन यानादी धुंकूगु दु । आशाकाजी थकू, मञ्जु श्रेष्ठ, स्वतन्त्र 'संसार' महर्जन, रस्मी महर्जन, अनुर मानन्धर, मिथिलेश श्रेष्ठ आदि कलाकारपिनि मू भुमिका दुगु इहिपाया छायांकन गुण्ाराज शाक्यं यानादीगु दु ।

More Stories Like this