गं प्याखनय् राष्ट्रपतिनाप छाय् महिल खड्ग ?
नेवा:तय् आदिभूमि नेपालमण्डल दुने दुगु थीथी महत्वं जा:गु प्याखं मध्ये पचली भैरव गं प्याखं छगू नं ख: । थुगु प्याखंयात गथु प्याखं नं धायेगु या: । लिच्छवीकालंनिसें न्ह्यानाव:गु धयात:गु थुगु प्याखं मल्लकाल अले शाहकालया जुजु वीरेन्द्रया पालय् तक नं जुजु अथवा राष्ट्रप्रमुखनाप खड्ग हिला: शक्ति पुनस्र्थापना यायेगु ज्या यानावयाच्वंगु ख: । देय्या हिलावंगु परिस्थिति अनुसार देशय् राजतन्त्र अन्त्य जुया: जनताया काय्मचा हे राष्ट्रप्रमुख राष्ट्रपति बने जुल । थुपाले नं गं प्याखं न्ह्यात तर राष्ट्रप्रमुखनाप खड्ग हिला: यायेमा:गु खड्ग सिद्धि ज्या धा:सा मयात । थुकिं राष्टि्रय महत्वं जा:गु पचली भैरवया गं प्याखंयात राष्टि्रय रुपं पहिचान बीगु ज्याय् घाटा जूवंगु खँ सांस्कृतिक विज्ञपिनि धापू दु ।
माली (गथु) जातिं हुइका व:गु थुगु पचली भैरव गं प्याखं न्हापा महर्जन (ज्यापु) जातिं चले यानाव:गु प्याखं ख: । लिपा वना: थ्व प्याखं गथु जातिं हुइका व:गु ख: । पचली भैरवं देय् चले याना वइच्वंम्ह जुजुयात १२ दँय् छक्व: खड्ग हिला: शक्ति बीगु पुलांगु तान्त्रिक परम्पराया रुपय् कयात:गु दु । १२ दँ दतकि जुजुयात बियात:गु शक्ति क्षीण जुया वनीगु जूगुलिं १२ दँय् छक्व: खड्ग हिला: शक्ति बीगु अथवा शक्ति रिचार्ज यायेगु चलन दुगु ख: । थुगु ल्याखं धायेगु ख:सा नं पचली भैरवं गं प्याखं राष्टि्रय सुरक्षा नाप स्वा:गु प्याखंया रुपय् कायेछिं । जुजु अर्थात् राष्ट्रप्रमुखयात शक्ति बिया: देय्या सुरक्षा यायेत ग्वाहालि बिया बिज्याइम्ह पचली भैरव तान्त्रिक रुपं बिस्कं हे महत्व दुम्ह द्य: ख: । वसपोलयात 'आज्जु' धका: नं झीसं धयावया च्वनागु दु । थन उठे जुयाच्वंगु खँ गं प्याखं हुइकेगु झ्वलय् राष्ट्रपति नाप खड्ग हिलेगु ज्या मया:गु ख: ।
खय्तला थ्व छगू गुथि दुने सीमित मनूतय् निर्णय जक नं जुइफु । तर अथे जूसां नं तबि राष्टि्रय पर्वया रुपय् सम्मान बियात:गु गं प्याखं नं थुगु मान्यता त्व:फीकूगु दु । थ्व नेवा: संस्कृतिया नितिं हे घाटा ख: । खय्तला पचली भैरव झी सकसियां परापूर्वकालंनिसें मानय् याना वयाच्वनाम्ह आजु ख: । आजु झी नितिं त:धं थुकी निगू मत मदु । अथे जूसां राष्ट्रप्रमुखनाप खड्ग हिलेगु ज्या न्ह्याका तुं वनाच्वंगु ख:सा राष्टि्रय पर्वया रुपय् नेवा:तय् थ्व प्याखं छगू नं लिपा तकं देसं सियाच्वनीगु ख: । थज्या:गु सवालय् नेवा:तय्सं सरोकार क्यनेमा:गु खनेदु । राज्यं हे सम्मानित यानात:गु छुं नं जात्रापर्वयात छुं नं कथंया राजनीति नाप मस्वासे यंकेमा:गु खँय् संस्कृतिविज्ञपिसं ब: ब्यूगु दु ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
