मिस नेवाःतय् मिस हेमा

मधु श्रेष्ठ
नेवाः समुदायया उत्थानया निंतिं जिं ज्या यानाच्वनागु दु, फुसा छिकपिंसं ग्वाहालि यानादिसँ, सल्लाह सुझाव बियादिसँ। मखु ला धइगु खःसा पिने च्वनाः थीथी कथंया खँ मल्हायेत इनाप यानाच्वना।
नेवाः मिसात आः शिक्षा जक मखु मेमेगु ख्यलय् नं न्हापाया तुलनाय् यक्वं ह्यःने वनेधुंकूगु दु।
न्ह्याम्हं मनूयाके छगू न छगू प्रतिभा दयाच्वनी। थःगु प्रतिभा, थःगु भाय्, थःगु संस्कृति, संस्कार न्हना वनेत्यंगु थौंया अवस्थाय् न्हूगु पुस्तायात थुखेपाखे आकर्षित यायेगु ताः तयाः मिस नेवाः' ज्याझ्वः न्ह्याका वयाच्वंम्ह छम्ह बिस्कं व्यक्तित्व खः मय्जु हेमा मानन्धर।
भाजु मोहनकृष्ण श्रेष्ठ व मय्जु लक्ष्मी श्रेष्ठया कोखं दोलखाय् बूम्ह हेमा श्रेष्ठ येँया थँहितिइ च्वंम्ह भाजु तिलनारायण मानन्धरलिसे इहिपा जुइवं हेमा मानन्धर जुल। औपचारि शिक्षा कन्या हाइस्कूलय् कयादीम्ह वय्कः थौंकन्हय् संस्कृतिइ ग्राय्जुयसन सिधयेकाः पद्मकन्या कलेजय् सोसियोलोजी स्नातकोत्तर ब्वनाच्वनादीगु दु। थौंकन्हय् धापासीइ च्वनादीम्ह वय्कलं छम्ह मिसा जुयाः निर्वाह यायेमाःगु फुक्क दायित्व कुबिसें नेवाःतय् सामाजिक उत्थानया निंतिं बागबजारय् नेपलिज फेसन होम' संचालन यानादीगु दु।
हरेक दँय् डिसेम्बर ३१ कुन्हु 'मिस नेवाः' ज्याझ्वः याना वयाच्वंगु न्हय्दँ दत। मिस नेवाः, मिस लिटिल नेवाः, बांलाःम्ह मय्जु, मिस व मिस्टर नेवाः जक मखु थीथी जातिया अस्तित्व ल्यंका तयेगु ताः तयाः थुगु संस्थां मिस क्वीन, मिस तामाङ्ग, मिस गुरुङ्ग आदि नं याना वयाच्वंगु दु।
नेवाः भाय् व नेवाः संस्कृति उत्थान याये धकाः मिस नेवाः ग्वसाः ग्वया वयाच्वगु खः, तर मिस नेवाः ज्याझ्वलय् नेवाः भाय् हे मछ्यः धइगु द्वपं दु। थुकी वय्कलं आक्रोशित जुयाः लिसः बियादी, 'छिकपिंसं थःगु छेँय् धाःसा नेवाः भाय्, संस्कार छुं हे मस्यनेगु अले आः वयाः लछिया दुने फुक्वं स्यने फइ ला? नेवाः समुदायया उत्थानया निंतिं जिं ज्या यानाच्वनागु दु, फुसा छिकपिंसं ग्वाहालि यानादिसँ, सल्लाह सुझाव बियादिसँ। मखु ला धइगु खःसा पिने च्वनाः थीथी कथंया खँ मल्हायेत इनाप यानाच्वना।
कारण जिं ध्यबाया लागि मखु नेवाः समुदायया उत्थानया लागि थुज्वःगु ज्याझ्वः न्ह्याकाच्वनागु खः।'
थः मस्तय्त नेवाः भाय् मस्यनेगु छगू बांमलाःगु चलन हे जुइधुंकूगु झीगु समाजय् थुकथंया 'मिस नेवाः' थेंज्याःगु ज्याझ्वलं बांलाःगु हे लिच्वः लाकीगु वय्कःया बिचाः खः। थ्वहे सन्दर्भय् वय्कलं धयादी, 'यदि झीसं आः नं नेवाः भाय्, संस्कृतियात ल्वःमंकल धाःसा भविष्यय् झीसं छुं यायेगु अवस्था हे जुइ मखु, झीगु भाषा अथें हे सिनावनी।' न्हापा न्हापा स्वनिगलय् च्वंपिं खस, ब्रम्हू, मारवाडीतय्सं तकं नेवाः भाय् ल्हाये सः तर थौंया अवस्थाय् नेवाःतय्सं हे नं थुगु भाय् ल्हाये मसःगु खँय् बः बिसें वय्कलं नेप्लिज फेसन होमं यानाच्वंगु थीथी ज्याझ्वलं न्हूगु पुस्तायात नेवाः भाय् स्यनेगु ज्याय् तिबः जूवनीगु खँय् थः निर्धक्क जुयागु खँ कनादिल।
मिस नेवाः ज्याझ्वलय् ब्वति कायेगु लागिं शारीरिक सौन्दर्य उलि आवश्यक मजू धासें वय्कलं धयादी, 'म्होतिं नं ५ फिट उचाइ दःसा गाः।' झिंखुदँनिसें नीनिदँ दुपिंसं ब्वति काये फइगु थुगु ज्याझ्वलय् थौंकन्हय् यक्व हे मिसा मस्त आकर्षित जुयाच्वंगु हर्षया खँ कनादिसें मय्जु मानन्धरं मिस नेवाः ज्याझ्वलय् ख्वीम्हनिसें निसःम्हसिनं ब्वति काः वइगु जूसां थःपिंसं मुक्कं स्वीखुम्हेसित जक ल्ययेगु यानाच्वनागु जानकारी बियादिल। अथे हे ब्वति काःवःपिं मिस्तय्त लछि वा लत्या तक नेवाः भाय्, संस्कृति, संस्कार व पुलांगु तिसाया बारे जानकारी बीगु लिसें नेपाल लिपि आखः तक नं स्यनेगु खँ नं कनादी।
छुं नं संघ, संस्था व समाजसेवा हे यायेगु ज्या छाय् मजुइमा, उकिया निंतिं आर्थिक तिबःया आवश्यकता नं जुयाच्वनी। थुकिया सन्दर्भय् वय्कलं कनादी, 'संस्थाया आर्थिक स्रोत धइगु हे कासाय् ब्वति काइपिं मस्तय्के कायेगु यानाच्वंगु फि खः। गुगु न्हापा न्याद्वः जुयाच्वंगु खःसा थौंकन्हय् न्हय्द्वः व न्हय्सः जूगु दु। अले मेमेगु ज्याझ्वःया निंतिं आर्थिक व्यवस्था धइगु व्यवसायीपिंसं याइगु प्रायोजन व न्यासः, स्वसः वंगु टिकट मीगु आदि खः।' 'मिस नेवाः' या प्रायोजन याइपिं धाःसा अप्वः यानाः सोनी, युएफओ, एभरेष्ट बियर, नमुना टेलर आदि हे जुयाच्वंगु दु।
वंगु दँय् मिस नेवाः जुइधुंकूपिं मस्तय्के थुकथंया ज्याझ्वलं छुं उपलब्धि जूगु हे दयेमाः धासें वय्कलं धयादी, 'न्हापायापिं मिस नेवाः मध्ये गुम्हं इमेज च्यानलय् समाचार बीपिं, गुम्हं विद्यालयय् संचालक, गुम्हं प्रिज्मा एडभर्टिजमेन्टय् ज्या यानाच्वंगु दुसा गुम्हं धाःसा ब्वना हे च्वंगु दु।' थुकिया लिसें आर्थिक अवस्था कमजोर जुयाः नयेत्वने मखंपिं, पुने मखंपिं मस्तय्गु निंतिं नसा ज्वलं व वसः इनेगु ज्या नं थःगु संस्थां यानाच्वंगु जानकारी बियादी मय्जु मानन्धरं।
नेप्लिज फेसन होमं भविष्यय् अझ अप्वः नेवाः समुदायया उत्थानया निंतिं थीथी प्रगतिया ताः तयाच्वनागु दु धासें मय्जु हेमां याकनं हे छगू स्कूल थें तालिम कक्षा संचालन यायेत्यनागु व उगु कक्षाय् नेवाः भाय्, तजिलजि, संस्कार, संस्कृति, लिपि फुक्क स्यनेगु जानकारी नं बियादिल। खुला तक न्ह्याइगु उगु तालिमय् उमेरया बन्देज मदइगु व लछिया द्वःछि दामं हे थःगु जातीय गौरब थकायेगु व भाषाया संरक्षणया निंतिं बः जू वनीगु बिचाः नं वय्कलं प्वंकादीगु दु।
थौंकन्हय्या न्हूगु पिंढीया मस्तय्त नेवाः भाय्, संस्कार, आत्मविश्वास जक मखु रोजगारया निंतिं तकं सक्षम यायेत वयकलं यानादीगु निरन्तर कुतः नेवाः मिसातय्गु लागिं लाभदायी जुइगु खँय् छुं नं शंका मदु।

More Stories Like this