अन्ततः हानं आयोग हे गठनपाखे

राज्य पुनर्संरचनाया खँय् वयाच्वंगु विवाद समाधान यायेत विज्ञ पुचः दयेकेगु धकाः वःगु प्रस्तावयात जनजातितय्सं विरोध यायेवं आखिर हानं चाःहीकाः अन्तरिम संविधानय् व्यवस्था यानातः थें आयोग हे दयेकेगु धकाः निर्णय जूगु दु। संविधानय् मेगु संशोधन मयासे आयोग हे दयेकेगु धकाः दलतय्सं याःगु निर्णयपाखें तत्कालया समस्या ला समाधान याना बिउगु दु। तर लिपा लिपा वयेफुगु विवादया मेगु तद्वाःगु लुखा धाःसा ह्वातां जुइक चायेका बिउगु दु। दकलय् न्हापां ला विज्ञ पुचःया पलेसा आयोग हे दयेकेगु धकाः याःगु निर्णय जुइवं स्वंगू तःधंगु दल व मधेसी मोर्चा दथुइ जूगु न्हय्गू बुँदाया सम्झौताया उल्लंघन जूवंगु दु। सम्झौता उल्लंघनयात राष्ट्रपति डा. रामवरण यादवं समेत चिउताः प्वंकादीगु दु। वय्कलं न्हय्गू बुँदाया सहमतिइ हस्ताक्षर याःपिं प्यंगुलिं घटकया नेतातय्त सःताः सम्झौताया मेमेगु बुँदाय् नं थथे हे संशोधन जुजुं वनीगु खः लाकि धकाः चिउताः प्वंकादीगु खः।
उखे आः गठन जुइ धाःगु आयोग नं गज्याःगु जुइ व उकिं छु छु ज्या याइ धइगु खँय् मेगु विवाद पिहां वइगु नं उतिकं हे सम्भावना दनि। तत्कालया विवाद समाधान जूगु खँय् ला सकस्यां थुकियात लसकुस हे याःगु दु। तर आयोग गठनया सवालयात कयाः धकाः आः तक जनजातितय्सं स्पष्ट बिचाः बिउगु मदुनि। स्वन्हुया दुने आयोग यदि गठन जुल धाःसा उकियात कयाः मेगु विवाद नं तुरुन्त हे पिहां वइ जुइ। नेतातय्सं दुरदर्शी जुयाः निर्णय यायेगु सिबें नं तत्कालया विवाद ज्यंकेत जक 'ततःधंगु' निर्णय याइगु कारणं यानाः थज्याःगु समस्यात वयाच्वनीगु खः।

More Stories Like this