किसि मागःतय्के लोकसेवां जाँच काल

चितवन/चितवनया सौराहाय् च्वंगु नेपाःया हे छगूयां छगू जक किसि प्रजनन् केन्द्रय् किसिया सुसाःकुसाः याइपिं किसि मागःतय्त न्हापांखुसी लाकेसेवाया जाँच काःगु दु।
चितवन निकुञ्जय् हे लोकसेवाया अधिकारीत स्थलगत भ्रमणय् वनाः अनया स्वीम्ह किसि मागःतय्के जाँच काःगु खँ चितवन राष्ट्रिय निकुञ्जया प्रमुख संरक्षक अधिकृत झमकबहादुर कार्कीं धाःगु दु। वय्कलं करारय् ज्या यानाच्वंपिं इमित न्हापांखुसी जाँच कयाः स्थायी प्रक्रिया न्ह्याकूगु खँ कनादिल।
जाँचय् उमिके किसियात थःगु हे भासं फ्यतुकेगु, थनेगु, म्हितकेगु, जंगलय् न्यासिके यंकेगु लगायत किसिलिसे स्वापू दुगु थीथी गतिविधिया बारे स्थलगत जाँच कायेगु ज्या जूगु खः।
करारया कर्र्मचारीत धाःगु इलय् मवइगुलिं किसिया सुसाःकुसाः यायेत थाकुगु कारणं आयोगं जाँच काःगु व आः धाःसा समस्या मजुइगु किसि प्रजनन् केन्द्र सौराहाया प्रमुख रामेश्वर चौधरीं धाःगु दु।