जग्गा लित बीत प्रचण्ड बर्दियाय्

येँ(सन्ध्या टाइम्स)/द्वन्द्वकालय् माओवादीं कब्जा यानातःगु छेँबुँ लित बीगु नितिं माओवादीया हे अध्यक्ष प्रचण्ड व कांग्रेसया महामन्त्री कृष्ण प्रसाद सिटौला थौं बर्दिया वनेत्यंगु दु।
स्वंगू दल नापं मधेसी मोर्चाया शीर्ष नेतातय् दथुइ लिपांगु इलय् जूगु ७ बुँदाया सहमति कथं कब्जा यानातःगु सम्पत्ति लित बीकेगु निंतिं वय्कःपिं उखेपाखे वनेत्यंगु खः। उगु सहमतिइ थ्वहे मंसीर ७ गते तकया दुने कब्जा सम्पत्ति लित बीगु खँ न्ह्यथनातःगु दु। सहमति कार्यान्वयन यायेगु नितिं माओवादीं आन्तरिक सर्कुलर जारी यायेधुंकूगु दुसा गृह प्रशासनं तकं उकिया नितिं माःगु कथं तयारी यायेधुंकूगु दु। तर पार्टी दुनेया असन्तुष्ट उपाध्यक्ष मोहन बैद्य किरण पक्ष बैकल्पिक व्यवस्था मजुइकं कब्जा छेँबुँ लित बी मखु धायेवं थ्व ज्याय् अवरोध पिहां वःगु खः।