लडाकुत पुनर्स्थापनाय् छाय् मवन?

येँ(सन्ध्या टाइम्स)/देय्न्यंकंया थीथी शिविरय् च्वनाच्वंपिं माओवादी लडाकुया पुनर्वर्गीकरणया ज्या म्हिगःनिसें सुरु जूगु दु। म्हिगः न्हापांगु न्हि कुन्हु जूगु वर्गीकरणय् अप्वः लडाकुतय्सं सेनाय् समायोजन जुइगु विकल्पयात हे ल्यःगु दुसा थ्व धुंकाः स्वेच्छिक अवकासया विकल्प ल्यःपिं अप्वः पिहां वःगु दु। राज्यपाखें बीगु थीथी तालिम कयाः पुनर्स्थापनाय् वने धाःपिं धाःसा छम्ह हे पिहां मवल। आखिर राज्यं ९ लाख तकामछि खर्च यानाः बीगु तालिम व रकमया प्याकेज ग्रहण यानाः पुनर्स्थापनाय् वनेगु विकल्पयात छाय् लडाकुतय्सं स्वीकार मयात ले? थुकिया लिउने धाःसा तःधंगु सामाजिक कारण सुलाच्वंगु दु।
लडाकुया थ्व पुनर्वर्गीकरण सुरु जुइ न्ह्यः हे संयुक्त राष्ट्र संघीय निकाय युएनडीपीपाखें माओवादी लडाकुतय्त थीथी कथंया सीपमुलक तालिम बियाः निपुण जुइधुंकाः थीथी कारखाना व निजी संस्थाय् रोजगारी बीकेगु लागिं पहल याःगु खः। तर उकी आपालं संस्थातय्सं धाःसा पूर्व माओवादी लडाकु धायेसातकि उमित ज्याय् तयेगु इच्छा मयाः। तालिम कयाः ज्या सःपिं हे खःसां नं उमित रोजगारी बीगु वा थःपिनि निजी ज्या याकेगु इच्छा तक नं सुनां मयाःगु खनेदत। थुकिं यानाः पूर्व लडाकुतय्त तालिम बियाः रोजगारी बीकेगु धइगु उगु ग्वसाः ताःलाये मफुत।
मेखे जनयुद्धया इलय् गामय् छगू कथं शासकया भूमिका म्हितेधुंकूपिं लडाकुतय्त उपिंपाखें पीडित गांयापिंसं अझ नं सह यानाच्वंगु मदुनि। उमित हत्यारा, अपहरणकारी आदि आदि आरोप बियाः हैरान याइगु कारणं पूर्व लडाकुत आः थथें पुनर्स्थापनाय् वनेगु अवस्था मदयाच्वंगु खँ पुनर्स्थापनाया ज्याय् सक्रिय दुजःतय्सं कंगु दु।
वहे अनुभवया आधारय् लडाकुतय्सं आः नं पुनर्स्थापनाया प्याकेज मकाःगु सूत्रया दावी दु।