आयोग गठनय् नेतृत्वया विवाद

दलया कार्यकर्तायात हे विज्ञ दयेकाः हइगु

येँ (सन्ध्या टाइम्स)/राज्य पुनर्संरचना सम्बन्धी ज्याया लागिं विज्ञ समूह दयेकेगु धकाः वःगु प्रस्तावय् तःधंगु विवाद जुइवं अन्ततः राजनीतिक दलतय्सं विज्ञ पुचः मखु राज्य पुनर्संरचना आयोग हे दयेकेगु धकाः निर्णय यात। आः उगु निर्णय लिपा आयोगया नेतृत्व याइम्ह सु धइगु खँय् दलतय् दथुइ हानं मेगु विवाद पिहां वःगु दु ।

स्वंगुलिं हे तःधंगु दलतय्सं थःथःपिनिगु हे नेतृत्वय् आयोग दयेके दयेमाः धकाः अडान कायेवं थ्व विवाद पिहां वःगु खः। दलतय् दथुइ स्वन्हुया दुने आयोग गठन यायेगु धकाः सहमति जूगु दु। थ्वहे बारे निर्णय यायेत थौं च्वंगु शीर्ष नेतातय्गु बैठकय् थ्वहे खँय् विवाद जुइवं छुं निर्णय याये मफुत। थौं च्वंगु उगु बैठकं मधेसी मोर्चालिसे नं सहलह ब्याकाः कन्हय् तकया दुने राज्य पुनर्संरचना आयोग दयेकेगु धकाः सहमति याःगु दु ।

सिंहदरवारया शान्ति मन्त्रालयय् स्वंगू दलया शीर्ष नेतातय् दथुइ जूगु उगु बैठकय् न्हय्म्ह तक दुजः तयाः राज्य पुनर्संरचना आयोग दयेकेगु खँ वःगु दु। राज्य पुनर्संरचना सम्बन्धी विज्ञतय्त दुथ्याकाः आयोग दयेकेगु धाःसां दलया नेतातय्सं धाःसा उकी थःथःगु पार्टी समर्थक 'विज्ञ'त तयेगु लागिं कुतः यानाच्वंगु खँ सूत्रं धाःगु दु। उगु आयोग विज्ञतय्गु पुचःखःसां उकी पार्टीतय्सं हे भागबन्दा यानाः 'विज्ञ'त मनोनित याइगु सम्भावना अप्वयाच्वंगु खँ सूत्रं धाःगु दु ।

वंगु शुक्रवाः राज्य पुनर्संरचनाया नितिं संविधान संशोधन यानाः विज्ञ पुचः दयेकेगु धकाः जूगु कुतः सफल मजुइवं स्वंगू दल व मधेसी मोर्चाया सहमतिइ उगु प्रस्ताव लित कयाः अन्तरिम संविधानय् व्यवस्था यानातः थें आयोग हे दयेकेगु धकाः सहमति जूगु खः। उगु सहमति कथं आयोग दयेकेत म्हिगः न्हिच्छि नं प्रमुख दलया शीर्ष नेतातय् दथुइ सहलह जूगु खःसां छुं निर्णय याये मफयेवं थौं सुथय् हानं बैठक च्वंगु खः ।

राज्य पुनर्संरचनाया नितिं सरकारं दयेकीगु उगु आयोगया कार्यादेश बारे नं प्रमुख दलया नेतातय् दथुइ आः तक छुं सहमति जुइ फुगु मदुनि। उखे मधेसी मोर्चापाखें 'छगू मधेस छगू प्रदेश'या प्रस्ताव यंके फइ कथंया कार्यादेश आयोगयात बीमाः धकाः माग यानाच्वंगु दु ।

राज्य पुनर्संरचना आयोग गठन बारे संसदया राज्य पुनर्संरचना समितिया दुजः लिसें एमाले सभासद् डा. मंगलसिद्धि मानन्धरयात स्वापू तयाः न्यनाबलय् वय्कलं थ्व आयोग नं दलतय्गु भाडबन्डा जुयाः हे गठन जुइगु बिचाः प्वंकादिल। तर आयोग न्ह्यागु कथं गठन जूसां उकी पहिचानयात न्हापांगु प्राथमिकता मबीपिं मनूत तये दइ मखु धकाः आदिवासी जनजाति ख्यलं सः थ्वयेका च्वनेमाःगु खँ नं वय्कलं कनादिल ।