बाग्लुङ व म्याग्दीइ नं नेवाः भाय् व लिपि कक्षा
येँ(सन्ध्या टाइम्स)/नेवाः देय् दबुलिं ग्वसालय् बाग्लुङ जिल्लाय् निलाया नेवाः भाय् नापं लिपि कक्षा न्ह्याकूगु दु। मुक्कं स्वीप्यम्ह ल्याय्म्हतय्सं ब्वति काःगु उगु प्रशिक्षणय् ललित चन्द्र शाक्यं प्रशिक्षण बियादीगु खः। प्रशिक्षक शाक्यया धापू कथं अनया नेवाः भाय् तसकं हे शुद्ध जू। अथे खःसां बुराबुरितय्सं जक ल्हाइगु धाःसा दुःखया खँ खः। ल्याय्म्हतय्के भाय् सयेकेगु तःधंगु उत्साह दुगुलिं उमित हःपाः बीमाःगु वय्कःया बिचाः दु।
लछिया निंतिं जक कक्षा जूगु खःसां ब्वँमिपिनि इनाप कथं हाकनं लछि ई तनाः कक्षा काःगु खः। बाग्लुङ मंकाः खलःया ग्वाहालिइ न्ह्याःगु उगु प्रशिक्षण कक्षा व शिक्षकया निंतिं मंकाः खलःपाखें तःधंगु ग्वाहालि याःगु खः।
अथे हे म्याग्दीया सदरमुकाम बेनी बजारय् नं निला तक वय्कलं हे प्रशिक्षण बियादीगु दु। थुज्वःगु कक्षा निरन्तर जुयाच्वने माःगु व छगू प्रशिक्षणया निंतिं खुलाया ई बीमाःगु स्थानीय नेवाःतय्गु बिचाःयात ध्यान बीमाःगु खँय् नं वय्कलं बः बियादीगु दु।
