पार्टी पार्टीइ जनजाति ध्रुवीकरण

राज्य पुनर्संरचना सम्बन्धी ज्याया लागिं संसदं विज्ञ पुचः गठन यायेगु धकाः जुयाच्वंगु तयारीया विरोध व समर्थनय् थीथी राजनीतिक पार्टी दुने जनजाति व गैर जनजाति सभासद्/नेता दथुइ ध्रुवीकरण पिहां वःगु दु। संसदपाखें विज्ञ पुचः गठन यानाः राज्य पुनर्सरचना समितिं पहिचानया लिधंसाय् तयार याना तःगु राज्य पुनर्संरचनाया खाकायात खारेज याना बीगु खतरा दुगुलिं आदिवासी जनजातितय्सं विज्ञ पुचः गठनया ज्यायात विरोध याना वयाच्वंगु खः। पार्टीत, खास यानाः तःधंगु स्वंगू पार्टीया नेतृत्व विज्ञ पुचः गठन यायेगु पक्षय् दुसां अन हे च्वंपिं जनजाति सभासद् व नेतातय्सं विज्ञ पुचः गठनया विरोध यायेवं हरेक पार्टी दुने जनजाति व गैर जनजातिया ध्वः स्पष्ट किउगु खने दुगु खः। पार्टी दुने खने दया वःगु थ्व जातीय विभाजनयात पार्टी नेतृत्वं धाःसा गम्भीर रुपं काःगु खनेदत। नेपाली कांग्रेसया न्याम्ह सभासद्तय्सं विज्ञ पुचः गठनया विरोध याःगु खःसां पार्टी नेतृत्वं उपिं न्याम्हेसितं तुरुन्त हे ह्ययेकाः 'लाइन'य् हल।अथे हे एमाले दुने नं छपुचः जनजाति सभासद्तय्सं फरक बिचाः तयेवं पार्टी नेतृत्वं तुरुन्त हे उपिंलिसे वार्ता सुरु यात। माओवादीं ला थःपिनि केन्द्रीय बैठक हे दिकाः न्हापालाक थ्व विवाद ज्यंकेगु लागिं निं पहल यात। जनजातिया मुद्दायात पार्टी नेतृत्वं थथे गम्भीर रुपं काःगु थ्व सकारात्मक खँ खः। नेतृत्वयात थःपिनि मुद्दा प्रति थथे गम्भीर याना तयेगु खःसा जनजाति सभासद्, आन्दोलन व संघ संस्था छधी जुयाच्वनेमाःगु आवश्यकता दु। जनजाति सभासद्त छधी जुयाः दना बिउगुलिं हे पार्टी नेतृत्वं उमिगु मुद्दायात ध्यान बिउगु खँयात ल्वःमंके मजिउ।

More Stories Like this