शिविर शिविरय् लडाकुयात लडाकुतय्सं हे सम्झे याये मालाच्वन
येँ(सन्ध्या टाइम्स)/सातौं डिभिजन तालबन्द अन्तर्गत लिस्नेगाम बडैपुरय् सेना समायोजनया ज्याय् अवरोध पिकायेत तयारी यानाच्वंपिं लडाकुतय्गु मागयात पार्टीया च्वय् थ्यंकेगु सहमति जूगु दु। सेना समायोजन सम्मानजनक गरिकां जुइकेगु खःसा व्यक्तिगत मापदण्डया आधारय् मजुसे समूहगत रुपय् समायोजन जुइमाःगु, दर्जा निर्धारण स्पष्ट यायेमाःगु, कार्यक्षेत्र स्पष्ट जुइमाःगु, घाःपाः जूपिं व अपाङ्गतय्त राष्ट्रिय सम्मान यानाः व्यवस्थापन यायेमाःगु माग तयाः उमिसं थनिंनिसें सुरु जुइत्यंगु सेना समायोजनया ज्याय् अवरोध पिकायेत्यंगु खः। तर म्हिगः बहनी लिबाक तक लडाकुया कमाण्डरतलिसे जूगु वार्ता लिपा उमिगु मागयात पार्टीइ यंकेगु व उमिसं चाहिं समायोजनया ज्यायात ग्वाहालि यायेगु सहमति जूगु खः। माओवादीया किरण पक्षधर लडाकुतय्सं समायोजनया मोडालिटीया विरोध यासें म्हिगः न्हिच्छि सेना समायोजनया गतिविधिइ तकं सहभागी मजुसे असन्तुष्टि क्यनाच्वंगु खः।
