जनजातिपाखें संविधानसभा घेराउ

येँ(सन्ध्या टाइम्स)/राज्य पुनर्संरचनाया निंतिं विज्ञ पुचः आवश्यकता मदु धकाः सः थ्वयेकाच्वंपिं आदिवासी जनजातिय्सं थौं स्वतस्फूर्त रुपं संविधानसभा घेराउ याइगु जूगु दु।
थौं च्वनीगु संसद बैठकय् प्रमुख दलया शीर्ष नेतातय्गु सहमति कथं संविधान संशोधन यानाः विज्ञ पुचः दयेकेगु ग्वसाः दुसा उकिया विरोध नापं आदिवासी जनजाति सभासद्तय्गु दबाव पुचः ककसपाखें तःगु संशोधन प्रस्तावया पक्षय् जनस्तरं समर्थन यायेगु निंतिं थ्व घेराउ यायेत्यंगु खः।
उकिया निंतिं म्हिगः बहनी लिबाक आदिवासी जनजातितय्गु थीथी खलः पुचःया ब्यागलं ब्यागलं बैठक च्वनाल् थौं स्वतस्फूर्त रुपं संविधानसभा घेराउ यायेगु निर्णय याःगु खः।
थौं नं सुथंनिसें आदिवासी जनजाति नेता नापं सभासद्तय्सं थौं संसदय् गज्याःगु भूमिका म्हितेगु धइगु विषययात कयाः औपचारिक नापं अनौपचारिक सहलह जुयाच्वंगु दु। थ्वहे झ्वलय् आदिवासी जनजाति नेता नापं समाजशास्त्री डा. कृष्णबहादुर भट्टचनं जनजातित संविधानसभा घेराउ यायेत तयार जुयाच्वंगु खँ कनादीगु दु।
वय्कलं संविधानसभा दुने आदिवासी जनजाति सभासद्त ल्वाइगु जूगुलिं इमित समर्थन यायेत पिने जनस्तरपाखें घेराउ याः वनेत्यंगु खँ नं कनादिल।
माओवादी, कांग्रेस व एमालेया शीर्ष नेतातय्सं गुकथं विज्ञ पुचःयात कयाः संशोधन प्रस्ताव हःगु खः उकियात माओवादी बरिष्ठ उपाध्यक्ष मोहन बैद्य पक्षं विरोध याना वयाच्वंगु दुसा थौं नं बैद्य पक्षया कार्यकर्तात शीर्ष नेतातय्त दबाब बीगु नापं आदिवासी जनजातिया मुद्दायात समर्थन यायेत न्हूबानेश्वरय् संविधानसभा घेराउ याःवनीगु जूगु दु।
थौं माओवादीया मसाल जुलुस
एकीकृत माओवादीया जनवर्गीय संगठन व जातीय मोर्चातय्गु मंकाः संगठन जातीय क्षेत्रीय गणतान्त्रिक महासंघं थौं बहनी मसाल जुलुस पिकाइगु जूगु दु। थौंया संसदय् शीर्ष नेतातय्सं विज्ञ पुचः गठन बारे पेले यानाः जूसां संविधान संशोधन याइगु अवस्था ब्वलना वःगुलिं अथे माओवादीया कार्यकर्तातय्सं सनिलय् ५ ताः इलय् येँया लुँहिति लागां मसाल जुलुस पिकायेगु तयारी याःगु खः। उगु मसाल जुलुसया नितिं माःकथं तयारी जुइधुंकूगु खँ धाःगु दु।
'पास यात धाःसा देसय् मि च्याइ'
शीर्ष नेतातय्गु प्रस्ताव कथं संसदं जबर्जस्ती विज्ञ पुचः दयेकल धाःसा देशय् मि च्याका बीगु ख्याच्वः नेपाल आदिवासी जनजाति महासंघया महासचिव आङकाजी शेर्पां बियादीगु दु। वय्कलं विज्ञ पुचःया प्रस्तावया विरोधय् थौं संविधानसभा घेराउ ज्याझ्वलय् सहभागी जुइत आदिवासी जनजाति नेता, कार्यकर्ता नापं संघीयतावादीतय्त आह्वान नं यानादिल।
जनजाति व शीर्ष नेतातय् वार्ता
अन्तरिम संविधान संशोधन यानाः विज्ञ पुचः दयेकेगु निंतिं तःधंगु स्वंगू दलया शीर्ष नेतातय्सं थौं संविधानसभाया आदिवासी जनजाति सभासद् दबाव समुह ककसलिसे वार्ता याःगु दु। विज्ञ पुचःयात जनजातितय्सं राज्य पुनर्संरचना समितिया सिफारिस कथं प्राविधिक पक्ष जक स्वयेगु कथं दयेकेमाः मखुसा स्वीकार याये मखु धया वयाच्वंगु दु।