म्याद थपया लिसः मवःनि
येँ(सन्ध्या टाइम्स)/देसय् राज्य पुनर्संरचनाया लागिं विज्ञ पुचः दयेकेगु खँय् विवाद पिहां वयाच्वंगु इलय् प्रधानमन्त्री डा. बाबुराम भट्टराईनं आकाझाकां तयादीगु संविधानसभाया म्याद थप सम्बन्धी प्रस्तावयात विपक्षी दल नेपाली कांग्रेस व एमालें लिसः मबिउनि।
विज्ञ पुचः गठनया विवाद बारे खँ ल्हायेत म्हिगः च्वंगु स्वंगू दलया बैठकय् प्रधानमन्त्री भट्टराईनं संविधान सभाया म्याद खुला थपे यायेत मौखिक प्रस्ताव नं तयादीगु खः। तर विपक्षी दल कांग्रेस व एमालें धाःसा वर्तमान सरकार विघटन यानाः राष्ट्रिय सरकार गठन याइगु खः लाकि मखु व स्वयाः जक म्याद थप बारे लिसः बीगु जुइ धाःगु दु।
आः संविधानसभाया म्याद खुला थपे यायेगु कि स्वला थपे यायेगु धइगु विषय राष्ट्रिय सरकार गज्याःगु गठन जुइ धइगु खँय् निर्भर जुइगु बिचाः एमाले व कांग्रेस नेतातय्सं प्वंकूगु दु।
