नेतृत्वं किसान व सुकुम्वासीयात झंगःलात

येँ (झीगु स्वनिगः)

एकीकृत नेकपा -माओवादी)या जनवर्गीय संगठन अखिल नेपाल किसान महासंघ -क्रान्तिकारी)या केन्द्रीय नेतातय्सं पार्टीया नायः प्रचण्डं किसान व सुकुम्बासीतय्त झंगःल्हात धकाः द्वपं बियादीगु दु । म्हिगः नेपालगञ्जय् पत्रकार नापलायेगु ज्याझ्वलय् न्वंवासें किसान नेतातय्सं अथे द्वपं बियादीगु खः । द्वन्द्वकालय् कब्जा यानातःगु जग्गा लित बिइगु पार्टीया नायःया निर्देशन पार्टीया निर्णय व लाइनया अःखः खः धयादिसें जबरजस्ती लित बिइकेत कुतः यात धाःसा प्रतिरोध यायेगु जुइ धकाः ख्याच्वः नं बियादिल । महासंघया मूछ्याञ्जे नन्दबहादुर बुढामगरंं न्हय्गू बुँदाया सहमति जनघाती व राष्ट्रघाती खः धयादिसें उकिया आधारय् दयेकूगु सरकारं जग्गा लित बिइगु ज्या जबरजस्ती यात धाःसा प्रतिकारय् क्वहां वयेत किसानतय्त आह्वान नं यानादीगु दु । जग्गा लित बिइगु निर्णयया विरुद्ध अभियानय् झायादीम्ह नेता बुढामगरं पार्टीया नेतृत्वं कब्जा जग्गा लित बिइकेगु ज्या धैगु जग्गा मियाः कमिसन नयेत्यंगु खः धकाः तकं द्वपं बियादिल ।

थुगु हे ज्याभवलय् ब्वति कयाः छेाय् च्वनाच्वंम्ह थारुवान राज्य समितिया दुजः युद्धयात राजापुर ईलाकाया इञ्चार्ज रक्तिमया नेतृत्वय् वःगु छगू पुचलं आक्रमण यानाः घाःपाः यानाब्यूगु दु । प्रचण्ड पक्षधर वय्कः रक्तिमं 'छ हे मखुला जमिन लित बीमखु धइम्ह, छं छु यायेफु या जमिनदारतय्गु जग्गा लित बियाः हे त्वःतेगु जुइ' धकाः बांम्ह सिक्क दायाः वंगु खा श्रोतं जानकारी ब्यूगु दु । लुमंकेबहःजू वंगु छुं दिं न्ह्यः जक अखिल नेपाल किसान महासंघ -क्रान्तिकारी) पाखें येँय् पत्रकार सम्मेलन यानाः जग्गा लितबिइगु जुइमखु धकाः घोषणा याःगु खः ।