थौं संसद घेराउ व मसाल जुलुस

येँ (झीगु स्वनिगः)

संविधानसभाया राज्य पुनर्संरचनासम्वन्धी समितिया प्रतिवेदन नापं फरकमतयात नं सन्दर्भ सामग्रीया रुपय् कयाः सुझाव बिइगु नितिं विशेषज्ञ पुचःया कार्यदेश दयेकेगु धकाः शीर्ष नेतातय्गु दथुइ सहमति जूगु दु ।
म्हिगः विहिवाः च्वंगु स्वंगू दलया शीर्ष नेतातय्गु मुँज्यां संविधान संशोधन सम्वन्धय् आःया प्रस्तावयात हे पारित यायेगु व अनंलिपा संविधानसभाया मेगु मुँज्या च्वनाः विज्ञ पुचःया कार्यदेश दयेकेगु धकाः निर्णय याःगु खः । एकीकृत माओवादीया बरिष्ठ न्वकु मोहन बैद्य किरण पक्षधर व आदिवासी जनजाति सभासद् ककसं राज्य पुनर्संरचना समितिया सिफारिसया आधारय् प्राविधिक रुपं सुझाव बिइगु नितिं जक विज्ञ पुचः दयेकेमाः मखुसा स्वीकार यायेगु जुइमखु धकाः धयाः वयाच्वंगु दु ।

उगु विज्ञ पुचःया विषययात कयाः थौं व्यवस्थापिका संसद भवनया घेराउ याइगु जूगु दु । आदिवासी जनजाति महासंघं सभासद्तय्त हःपाः व लिधासा बीगुकथं व थःपिनिगु माग पूवंकेगु उद्देश्यं उगु घेराउ ज्याभवः यायेत्यंगु खः । अथेहे जातीय स्वायत्त व संघीयताया नितिं संयुक्त मोर्चाया ग्वसालय् सनिलया प्यताः इलय् सुन्धारां मसाल जुलुस पिकाइगु जूगु दु । लकस हिलः धाःसा सम्बन्धित पक्षनापं खाल्हायेत च्यागू दलया छगू वार्ता पुचः नं नीस्वंगु दु ।