सातौं डिभिजनया जनसेनातपाखें रोलकल बहिस्कार

'आःया मोडालिटीइ भविष्य मदु’

येँ (झीगु स्वनिगः)

सातौं डिभिजन अन्तर्गतया सहायक शिविर बडैपुरया लिस्नेग्राम वि्रगेडय् कमाण्डरत लिसें फुक्क धैथे जनसेना गुगु नं हालतय् सेना समायोजनय् वनेमाः धकाः दबाव ब्यूगुयात अस्वीकार यानाः लडाकुत समायोजनपाखें ब्यागलं च्वनेगु घोषणा यानाः मैदानय् क्वहां वःगु दु । समायोजनय् वनेत दबाव बिइत सःतूगु रोलकलयात इमिसं म्हिगः सुथय् बहिस्कार यानाः विरोधय् क्वहां वःगु खः । इपिं न्हिच्छि हे सैन्य गतिविधिइ तकं समावेश मजुल । बहिस्कार घोषणाया बारे थौं शुक्रवार आधिकारीक रुपं संचारमाध्यमयात जानकारी बिइगु जूगु दु । बहिस्कार याःगु पुचःया नेतृत्व याःपिं ४ नम्बर बटालिनया कम्पनी कमान्डर रणबहादुर विष्टं संचारकर्मीतलिसे खँ ल्हायेगु झ्वलय् धयादिल 'स्पष्टताया नितिं नेतृत्वलिसे खँ ल्हाकेगु धकाः डिभिजन कमान्डरं धाःगुलिं थौं विहिवाः पत्रकार सम्मलेन मयानागु खः, कन्हय् सुथय् अर्थात शुक्रवार सुथय् यायेगु जुइ ।'

लिस्नेग्राम बि्रगेड अन्तर्गतया स्वम्ह बटालियनया ७ म्हसिबें अप्वः कम्पनी कमाण्डर स्तरया लडाकुतपाखें बहिस्कार यायेगु नेतृत्व याःगु दु । कम्पनी कमान्डरत निरबहादुर सिंह, शान्ति शाही, कमला धामी, सतराम थारु लगायतयापिंन्सं नेतृत्व याःगु दु । तत्कालया नितिं शिविरय् हे च्वनाः विरोध यायेगु व समायोजन प्रक्रिया आः थें हे न्ह्याकल धाःसा सतकय् तकं वयेगु जुइ धकाः धाःगु दु । लडाकुतय्सं आःया समायोजन, पुनस्र्थापना व स्वैच्छिक अवकाशया स्पष्ट खाका मवःगु, समायोजन, पुर्नस्थापना व स्वैच्छिक अवकासया मोडालिटीइ सुयागु नं भविष्य मदुगु, सत्ताया नितिं नेतृत्वं लडाकुयात अपमान यानाब्यूगु दु धकाः आक्रोश प्वंकूगु दु । स्वैच्छिक अवकासय् वनेगु इच्छा प्वंकूगुलिं नेतृत्वं समायोजनय् वनेत अनावश्यक दवाब बीवं उगु शिविरया जनसेनां थुगुकथं तं प्वंकूगु खः ।