नेपालय् वयाः भारतीय प्रहरीपाखें नेपाःमियात हे बन्धक

येँ (झीगु स्वनिगः)

थौंया इलय् नं भारतया प्रहरीत नेपालय् वयाः नेपाःमितय्त हे बन्धक याइ धकाः धायेबलय् अप्वः मनूत पत्याः मजुइफु । तर अज्वःगु हे घटना जूगु दु नकतिनि जक नेपालगञ्जय् । भारतया महाराष्ट्रपाखें ल्वाभः हे ज्वनाःवःपिं स्वम्ह भारतीय प्रहरीतय्सं अछामया तोली ३ या उपा रावल नांम्ह छम्ह ल्याय्म्हम्ह नेपाःमितया अछामया मेचीकाली होटलय् अथे अघोषित रुपं बन्धक यानातःगु दु । भारतया प्रहरीतय्सं १२ दिं न्ह्यःनिसें अथे बन्धक यानाः इपिं धाःसा येँपाखे वःगु दु । गन नं वने मते नापं मुम्बाई यंकेमानी धकाः भारतीय प्रहरीतय्सं ख्याःगुलिं छेँय् हे मवंसे रावल आः बन्धक जुयाः च्वनेमाःगु अवस्था दु ।
भारतया महाराष्ट्र प्रहरीं शिवसेनाया छम्ह नेताया छेँय् खुया यंकूगु घटनायात कयाः मेमेपिं ३६ म्ह नेपाःमितय्त ज्वनाः गैरन्यायीक कथं बन्दी तकं यानातःगु दु ।

बन्दी जुयाच्वनेमाःम्ह रावलंयात खुँया छेँ क्यनाः बिइमानी धयाः भारतीय प्रहरीत येँय् वःगु नापं इमिसं थःत शारिरीक व मानसिक यातना बिइगु ज्या तकं यात धकाः जानकारी संचारकर्मीतय्त ब्यूगु दु ।
नेपालय् भारतं राजनीतिक नाप नापं प्रशासनिक क्षेत्रय् नं हस्तक्षेप यानाः वयाच्वंगु अले सीमा लागाय् च्वंपिं नेपाःमिपिन्त दुःख बिइगु यानाः वयाच्वंगुया थ्व छगू नमुना घटना जक खःसा थुकियात कयाः आः सरकारं गज्वःगु कथं पलाः ल्ह्वनीगु खः व धाःसा स्वये ल्यं हे दनि ।