अन्ततः कांग्रेस—एमालेया डिजाइनया खुलासा

१४ प्रदेशयात गोलमाल यायेगु कुतः

<राज्य पुनर्संरचना समितिया म्याण्डेट कथं जक विज्ञ पुचः दयेकेमाः - माओवादी
संसदया मुँज्या मच्वंसे कन्हय् तकया नितिं स्थगित

येँ (झीगु स्वनिगः)

संविधानसभाया राज्य पुनर्संरचना नापं राज्य शक्ति बाँडफाँट समितिपाखें तयार याःगु नेवाः स्वायत्त प्रदेश नापं झिंप्यंगू प्रदेशयात गोलमाल यायेगु नितिं विज्ञ पुचः दयेकेत कांग्रेस व एमालें योजना दयेकूगु खुलासा जूगु दु । राज्य पुनर्संरचना आयोगया थासय् विज्ञ पुचः दयेकाः राज्य पुनर्संरचना समितिं तयार याःगु राज्य पुनर्संरचनाया प्रस्तावयात गोलमाल यायेगु नितिं अधिकार सम्पन्न विज्ञ पुचः दयेकेगु योजना कांग्रेस व एमालें दयेकूगु खः धकाः म्हिगः बुधवाः प्रमुख दलतय्गु मुँज्यां स्पष्ट जूगु दु ।

एकीकृत नेकपा -माओवादीं) राज्य पुनर्संरचना समितिया सुझावया आधारय् जक प्राविधिक ज्या यायेगु नितिं जक अथे विज्ञ पुचः दयेकेमाः धकाः तःगु प्रस्तावयात कांग्रेस व एमालें अस्वीकार याःगु खः ।
अथे कांग्रेस व एमालें संवैधानिक अंग कथं हे विज्ञ पुचः दयेकेमाः धकाः अडान तःगुलिं अन्ततः म्हिगः बुधवाःया स्वंगू दलया शीर्ष नेतातय्गु मुँज्या विनानिष्कर्ष क्वचाःगु खः । अथे दलतय्गु दथुइ सहमति जुइ मफयेवं व्यवस्थापिका संसदया म्हिगः च्वनेगु धयातःगु मुँज्या च्वं हे मच्वंसे कन्हय् शुक्रवाः तकया नितिं स्थगित जूगु दु ।

संविधानय् राज्य पुनर्संरचना आयोग दयेकेगु धकाः न्ह्यथनातःगु थासय् विज्ञ पुचः दयेकेगु धकाः संशोधन यायेत थौं व्यवस्थापिका संसदया मुँज्या सःतातःगु खः । अथे मुँज्या जुइ न्ह्यः हे नेपाःया आदिवासी जनजाति सभासद्त नापं एकीकृत माओवादीया बरिष्ठ न्वकु मोहन बैद्य किरण, मूछ्याञ्जे रामबहादुर थापा बादल पक्षधरयापिन्सं विज्ञ पुचः धैगु राज्य पुनर्संरचना समितिया सुझाव कथं प्राविधिक रुपं जक स्वयेगु ज्या बिइमाःगु नापं राज्य पुनर्संरचना समितिपाखें तयार याःगु १४ प्रदेशया अवधारणा यात छुं हे याये दैमखु धकाः अडान काःगुलिं अन्ततः प्रमुख दलया नेतातय्त उगु कथं तःधंगु लिच्वः लाःगु खः । म्हिगः सुथय् हे स्वंगू दलया शीर्ष नेताय्गु मुँज्या च्वनाः विज्ञ पुचः धैगु सुझाव बिइत जक खः धकाः सहमति जूगु खःसां माओवादीया बैद्य पक्ष नापं आदिवासी जनजातिया सभासद्तय्सं संविधानसभां विज्ञ पुचः दयेकाः संवैधानिक अंगया रुपय् तयेगु कथं गुगु हालतय् स्वीकार याये फैमखु धकाः अडान काःगु खः ।

अनं लिपा एकीकृत माओवादीया आकस्मिक स्थायी समितिया मुँज्या च्वंगु खः । उगु मुँज्यां छगू हे मतं राज्य पुनर्संरचना समितिया सुझावया आधारय् प्राविधिक पक्षयात स्वयेगु नितिं जक विज्ञ पुचः दयेकेगु जुइ धकाः खँ क्वःछ्यूगु खः । अनंलिपा माओवादीया नेतात स्वंगू दलया मुँज्या च्वनाः थःपिनिगु खँ तःगु इलय् कांग्रेस व एमालेया नेतातय्सं अधिकार सम्पन्न विज्ञ पुचः दयेकेगु धकाः अडान तःगु खः । इमिसं राज्य पुनर्संरचना समितिया प्रस्तावयात तकं हिइके फैगु अधिकार दुगु विज्ञ पुचः दयेकमाः धकाः अडान तयेवं अन्ततः मुँज्या निष्कर्षविहिन जूगु खः । अनंलिपा व्यवस्थापिका संसदया मुँज्या तकं स्थगित जूगु खः ।