पुरातात्विक लागाय् छुकिया ग्रीन बेल्ट ?
मखनय् महाद्य:याथाय् न्ह्य:ने च्वंगु वंगलसिमा व वयांक्वय् तलेजुइ दुहां वनेथाय् लुखापिने च्वंगु रुखकमल सिमां उगु जुगया हे र्इया लुमंकेव्यू, अझ तलेजुइ दुहां वने धुका: अन दुगु भराय्धंगु सिमात ला इतिहासया साछी हे थें खनेदु । तर वसन्तपूया लागाया सिमेन्टीया जडान दुगु ल्वहँत सीगु ज्या गुलितक पुरातात्विक खँत स्मरण् याकीगु ख: धइगु न्ह्यस: न्ह्याबलें दनाच्वंगु दहे दु, थुज्व:गु अवस्थाय् वसन्तपू निसें न्हूसतकया गेट तक ग्रीनबेल्ट दयेकेगु धइगु गुगु खँ व:गु दु, अन न्हूगु स्वामा व सिमा पिना: गथे जुइगु ख: थ्व विचा: यायेमा:गु खँ जूगु दु । खतुं न्हूसतकया गेटनिसें जुद्ध सालिक तकया लागा पुरातात्विक मजूसे राणाकालिन ख:, अन हान भुगोलपार्क नं दु, अथे जूगुलिं ग्रीनबेल्ट दयेकेगु आपत्तजिनक थ्यंक मखुसां उगु लागायात गुकथं विकास यायेगु धइगु सम्बन्धया वहस व छलफल न्ह्यायेमा:गु खनेदु ।
छक्व: महाद्य: पार्वती क्वय्या दवुली विदेशी स्वांमा, सिमा पिना: दुनियाँयात गिजे याये थें ज्या जूगु झीसं खँ हे खना । हानं न्हापा कुमारीद्य:याथाय् जक मखु, आपालं थासय् वज्र पाना: मर्मत संभार या:गु ख:, लिपा राण्कालय् व:गु थ्व बज्र पायेगु खँ मजिल धका: अप्पा हे सी दयेक तयेगु ज्या जुल । अथे जुगुलिं गुगु इलय् विकास जूगु ख:, उकिया उगु हे स्वरुपय् जूगु ख:, उकियात उगु हे स्वरुपय् तयातयेगु हे बांलागु खँ जुइफु । थ्व सकतां थासय् मखु कि संरक्षित लागाय् थुकथं हे जुइमा: । वास्तवय् न्हूसतक लागा धइगु मल्लकालिन पुरातात्विक लागाय् दुहां, वयेगु छगू लुखाखलु थें ख:, अथे जूगुलिं थ्व लागाया सवालय् विचा: यायेबलय् थ्व खँयात ध्यानय तये हे मा: । थुगु लागाय् बँपस: गाडावाल पस: मुख्य समस्याया विषयवस्तु जुयाच्वंगु दु । थुकियात चीकेगु प्रशासनिक ज्याखँय् प्रभावकारिता वयेफयाच्वंगु मदु । हानं उगु लागा बजार लागा जूगुलिं नं उतिकं हे भिडभाड नं जू । थुकथंया भिडभाड व हूलमूल नं पर्यटक मैत्री खँ मखु । अथे जूगुलिं थुकी नं विचा: ला याये हे माल । हुनुमानढोका दरवार क्षेत्रय् महानगरपालिकां ज्या या:गु झिंनिदँ ति जक दत । थ्वया न्ह्य: ला गुठी संस्थान पुरातत्व विभाग हे अन सकि्रय ख: । गुठी संस्थान धा:सां बहा: उठे याना जक नइगु । न्हापा काष्ठमण्डप मरुसतलय् नं पस:या बा: उठे याइगु, वि.सं. २०२० सालपाखें पुरातत्व विभागं काष्ठमण्डप मर्मत यासेलि पस: हे मतल । अनंलि धंसा देग: (कविन्द्रपुर)य् नं वि.सं. २०४५ साल तकपस: दुगु ख: । लिपा पुरातत्व विभागं हे मर्मत यासेंलि तिकिझ्या: पह:या खापा तया: तिना बिल । सिंह सत्तलय् धा:सा आ:तक नं पस: दनि ।
उगु लागाय् मोटर वइगु नं छगू त:धंगु समस्या जुयाच्वंगु दु । थुगु समस्या नं आ:तक ज्यंके मफुनि । उकिं समग्रताय् सकलें सरोकारवालात तया: व्यापक छलफल याना: छगु गुरु योजना हे दयेकेमा:गु खनेदु ।
News Location:
More Stories Like this
नेवा: आन्दोलनया उपलब्धी जनजाति आन्दोलनय् नेतृत्वया सवाल सामुद्रिक रेशमया लँ सम्बन्धी न्हापांगु एक्स्पो जनजाति आन्दोलनय् पद्मरत्नया नेतृत्व हिन्दूराष्ट्रया खँ आ: छाय् ?
