नेवा: प्रदेश दुने केन्द्रीय राजधानी च्वने फइला ?
नेपा:या राजधानी जुयाच्वंगु हुनिं हे थन सकलें मनूत वयाच्वंगु अर्थ थ्व स्वनिग:या लागा नेवा:तयगु मखुत धका: धायेगु पाय्छि मजू । थ्व नेवा:तय्गु हे आदिभुमि ख: व थन नेवा:तय्गु हे राज्य वा प्रदेश निर्माण् जुइमा: धइगु झीगु माग व दावी ख: । अथे ख:सा मेपिसं ला थन राजधानी छाय् तयातयेगु धका: धायेफु, राजधानी हे चीका: मन्त्रालय व विभाग जक मेथाय् यंकल धा:सा झीत आपत जुइ, व्यापार व्यवसाय नं बुलुहुँ वनी धका: ग्या:चिकु काइपिं नेवा:त नं झीगु दथुइ दयाच्वंगु दु । मेगु खँ स्वनिग:या ज:ख:या लागा नेवा: प्रदेश जुइधुंका: केन्दि्रय शासन प्रशासन गनं न्ह्याइ धइगु सवाल न पिदना च्वंगु दु । थुकि झी स्पष्ट जुइमा:गु दु । दकलय् न्हापां ला थन थुकथंया पूर्वाधार विकास जुइधंकूगु दु कि थन राजधानी मेथाय् यंकेगु धइगु उलि अ:पुगु ज्या मखु । उलिजक मखु, थनया नेवा:त सिंक धनाढ्य गैर नेवा:त, पहुँच वाल जक मखु नीति निर्माता, शासक प्रकाशकत नं थन हे 'सेटल' जुइधुंकूगु दु । अथे जूगुलिं नं इमिसं राजधानी चीकी धका: झीसं धन्दा कायेमा:गु सवाल हे मखु । वरु थ्वहे हुनिं याना: इपिं मेमेगु थासय् जातिय प्रदेश व्यूसा थन राजधानी प्रदेश दयेकेगु धका हे अनेककथंया दाउ याना जुगु दु । तर नेवा: प्रदेश बीगु केन्द्रया राजधानी धासा चीकेगु धका: खँ वल धा:सा छु यायेगु ले धइगु गनतक सवाल दु, उकि झीपिं स्पष्ट दु, यदि नेवा: प्रदेशया मूया रुपय् झीसं केन्द्रया राजधानी त्व:ते मालेगु ख:सा व झीत स्वीकार्य दु । अले केन्द्रया राजधानी जूगु ल्याखं थन केन्द्रया शासन प्रशासन न्ह्याकीगु निकायत न च्वनी, इमिगु विल्डिंग नं च्वनी । तर इमिसं याइगु ज्या व प्रदेशं याइगु ज्या पाइ । आ: हे नं राष्ट्रपतिया ज्या नं थन हे जुयाच्वंगु दु, प्रधानमन्त्रीया ज्या नं थनं हे जुयाच्वंगु दु, अले इमिगु प्रकि्रयां जुइगु ज्या न जुयाच्वंगु हे दु । अथे जूगुलिं थुकि कपा: स्याकेमा:गु खँ मदु । बरु केन्द्रया अधिकार छु गुलि तक दइगु व प्रदेशया अधिकार छु गुलि जुइगु धइगु सम्बन्धय् स्पष्ट जुइमाल । झीसं मुद्रा, वैदेशिक सम्बन्ध व बाह्य रक्षा बाहेकया सकलंे अधिकार प्रदेश सरकारयात दयेमा: धका: धयावयाच्वनागु द । तर प्रदेश दयेकेगु खँया हे सुनिश्चितताया नितिं ल्वानाच्वनागु जूगुलि थुकि झीसं बहस व विवाद यानाच्वनागु मदु । मुख्य ला भौगोलिक लागाय् तकं झीगु असहमति दु, तर थुकि ल्वाना च्वनेगु इलय् प्रदेश तक मवइगु खनेदुगुलिं उकिया विवाद तकं थाति तथा झी न्ह्या: वना च्वनागु अवस्थाय् अधिकारया सवाल नं प्रमुख हे ख:सां झीसं ल्ह्वना च्वनागु मदु । निष्कर्षय् खँ थ्वहे ख:कि झीत राजधानी प्रदेश स्वकीर्य जुइमखु । झीत सामथ्र्य व पहिचानया लिधंसाय् नेवा: प्रदेश मा: अले राजधानी तयेगु व चीकेगु खँय् व केन्द्र गन शासन यार्इ धइगु खँय् झीस अपाय्च्व: च्यूता: कायेमा:गु खँ मखु । देय्या प्रदेश दुने राजधानी च्वने मदइगु खँ गनं नं च्वयात:गु मदु । राजधानी न्ह्याथाय् सारेय् या:सां छगू नं छगू प्रदेशय् ला हे लाइ । विश्वया संघीय देशया स्वरुप स्वयेगु ख:सा नं क्यानाडा, अमेरिका, अफ्रिका आदि देय्या राजधानी नं छगू न छगू प्रदेशय् लाना हे च्वंगु दु । उकिं नेवा: प्रदेश दुने नं राजधानी तये मज्यूगु धइगु खँ गनं मदु । थुकिया आधार कायेगु ख:सां वैधानिक रुपं संघीय गण्तन्त्र नेपा:या राजधानी काठमाडौं जुइमज्यूगु मेथाय् हे सारे याये मा:गु छुं नं कथंया अनिवार्यता खनेमदु ।
News Location:
More Stories Like this
समाजसेवी दिलशोभापाखें सुभाय् देछा जय श्री संगीत समाजया ज्व:मदुगु ज्याझ्व: पुलांगु येँ शहर विकासया नितिं जागरण अभियान जागरणया न्हापांगु अधिवेशन वेश्यायात बेकमया मुद्दा
