न्ह्यलं

गणेशराम लाछि

बारुद व बमया कुं तिरिमिरि धाःगु मिखा
बम मूगु सलं ताःसु मलाःगु न्हाय्‌पं
सं कां जूगु मिखा तिफ्याये मफयाः
पावरवालया चश्मा मालाच्वन

प्यकालँया दथुइ दनाः लँ दाःम्ह लँजुवाः
गुगु लँपु वनेगु धैगु क्वःछिइ मफयाः
लँ क्यनीगु टर्च लाइट मालाच्वन

रिमोट कन्ट्रोलं चलय् जुइगु न्ह्यपु
छुं क्वःछिइ मफयाः
पचिपचि याना रिमोट मालाच्वन

स्वीच अफ याइगु ल्हाः मदयाः
त्वाँय् त्वाँय् न्यायेका च्वंगु माइक थें
म्हुतुप्वाः धाःसा सुनां तिकेमफु

माथं मवंगु दबुलिइ
निर्देशक मदुगु प्याखंया कलाकारत
लाखय् थें तिंतिं न्हुयाच्वन

संगीत मदुगु म्येया धुनय्
धोबीया तंम्ह गधा
बेतोरं हालाच्वन

लगाम मदुम्ह सल थें
बेतोरं ब्वाँय् जुयाच्वन
तिफ्याये मफुगु लकसय्
छरपस्त बिचाःत

आकासय् इमामन्दः कयाच्वन गिद्धत
इपःमिपः कनाच्वन लँ दाःपिं लँजुवाःत
दिशा छुटे याये मफयाः

गिद्ध व इमातय्‌सं छातिइ प्यंका
ला चच फुनाः सात्तु सालाच्वन
विचरा व विवशताया सिखलं
प्यपंका चिकाः लँय् थसः पायाच्वन

उकिं
थौं झी न्ह्यलं चायेमाल
चेतनाहीन न्ह्यपुतय्‌त
विवेक मदुगु बिचाःतय्‌त
स्याः चाइगु इन्जेकशन जुयाः
सुतु सुयाः बिइत

ई पुलाः नं दने मफयाः
सन्ह्यः वयेका च्वंपिं
कुम्भकर्णतय्‌त थनेत
झी कुकुल्यांकू हाला बिइमाल

लँय् चाता वनाच्वंपिं पित्याः प्वाःतय्‌त
आश्वासनया ध्यके ग्वारा मखु
धात्थेंगु ठोस वस्तु जुयाः

शदिं शदिंनिसें त्यतु त्ययेका च्वंपिं
तज्याये मफुगु उकुसमुकुसतय्‌त
थौं झी एटमबम जुयाः

खः थौं झी न्ह्यलं चायेमाल
मखुसा कन्ह्य‌्या ह्याउँम्ह सुर्द्यः लुइमखु
व सतक सतकय् थुरुथुरु खानाच्वंपिं
निरिहतय्‌त लुमुजः व्हलीम्ह सुर्द्यः जुयाः

सियाटल, सं.रा. अमेरिका

More Stories Like this