विज्ञ पुचःया खँय् सहलहया नितिं मुँज्या स्थगित

येँ (झीगु स्वनिगः)

एकीकृत नेकपा -माओवादी)या म्हिगः मंगलवाः च्वनेगु धाःगु मुँज्या कन्हय् विहिवाः तकया नितिं स्थगित याःगु दु । मेमेगु दलया नेतातलिसे राज्य पुनर्संरचनाया विषययात कयाः विज्ञ पुचः दयेकेगु नितिं संविधान संशोधनया प्रस्तावयात कयाः सहलह ब्याकेमाःगुलिं धकाः अथे माओवादीया केन्द्रीय कमिटीया मुँज्या स्थगित याःगु खः धकाः माओवादीया छम्ह नेतां जानकारी बियादीगु दु । स्वंगू दल एकीकृत माओवादी, नेपाली कांग्रेस व एमाले नापं मधेसी मोर्चाया शीर्ष नेतातय् दथुइ जूगु ७ बुँदाया सम्झौताय् राज्य पुनर्संरचनाया सवालय् आयोगया थासय् विज्ञ पुचः दयेकेगु धकाः उल्लेख जुयाच्वंगुयात एकीकृत माओवादीया बरिष्ठ न्वकु मोहन बैद्य किरण व मूछ्याञ्जे रामबहादुर थापा बादल पक्षधरयापिं नेतातय्सं विरोध यानाच्वंगुलिं मेमेगु दलतलिसे सहलह ब्याकेत धकाः अथे माओवादीया केन्द्रीय कमिटीया मुँज्या स्थगित याःगु खः । माओवादीया न्वकु किरण व मूछ्याञ्जे बादल पक्षधरं राज्य पुनर्संरचना तथा राज्य शक्ति बाँडफाँट समितिपाखें तयार याःगु १४ प्रदेशया प्रस्तावयात मस्यंकेगु कथं प्राविधिक पुचःया रुपय् जक विज्ञ पुचः दयेकेमाःगु, संवैधानिक अंगया रुपय् राज्य पुनर्संरचना आयोगया थासय् विज्ञ पुचः दयेके मजिउ धकाः अडान तयाः वयाच्वंगु खः ।

लुमंकेबहःजू राज्य पुनर्संरचना आयोगया थासय् विज्ञ पुचः तयेगु धकाः संविधान संशोधन यायेगु प्रस्ताव संसदय् हये धुंकूगु दुसा उकियात कयाः नेपाःया आदिवासी जनजाति नापं राज्यं बहिस्करणय् लाकातःपिं समुदायपाखें तच्वकं विरोध यानाः विज्ञ पुचःयात प्राविधिक पुचःया रुपय् जक यंकेमाः धकाः माग यानाः वयाच्वंगु दु ।