समायोजनया प्रक्रियाय् मवनेत आह्वान

येँ (झीगु स्वनिगः)

संविधानसभाय् दुथ्यानाच्वंगु दक्ले तःधंगु एकीकृत नेकपा -माओवादी) या बरिष्ठ न्वकु मोहन बैद्य किरण व मूछ्याञ्जे रामबहादुर थापा बादलं म्हिगः मंगलवाः छगू मंकाः कथं विज्ञप्ति पिकयाः सेना समायोजनया प्रंक्रियाय् सहभागी मजुइत आह्वान याःगु दु । उगु विज्ञप्तिइ आः गुगु कथं सेना समायोजनया प्रक्रिया न्ह्याकेत्यंगु दु वास्तवय् व जनसेनायात आत्मसमर्पण याकेगु, अपमान यायेगु ज्या जूवनाच्वंगु दु धकाः तकं न्ह्यथनातःगु दु । एकीकृत माओवादीया बरिष्ठ न्वकु किरण व मूछ्याञ्जे बादल पक्षया नेता व कार्यकर्तातय्सं कार्तिक १५ गते चान्हय् एकीकृत माओवादीया नायः पुष्पकमल दाहाल प्रचण्ड, कांग्रेसया सभापति सुशील कोइराला, एमालेया नायः झलनाथ खनाल व मधेसी मोर्चाया विजय गच्छेदार च्वनाः याःगु ७ बुँदाया सहमतियात विरोध यानाः पार्टीया मुँज्यांनिसें सतकय् तकं विरोध यानाः वयाच्वंगु खः । अथे माओवादीया हे बरिष्ठ नेतातय्सं पार्टीया निर्णय विरुद्ध मेमेगु दलतलिसे नेतृत्वंयात सम्झौता धकाः म्हीग सोमवाः च्वंगु माओवादीया केन्द्रीय समितिया मुँज्याय् तकं खँ तःगु खः । म्हीग सोमवाः च्वंगु सेना समायोजन विशेष समितिया मुँज्यां ७ बुँदाया सहमति कथं हे लडाकु पुनवर्गीकरणया नितिं ३० गते तकया दुने न्हय्गू हे मूमू शिविरय् प्राविधिक पुचः छ्वयेगु निर्णय याःगु खः ।

मंकाः विज्ञप्तिया पूवंक खँ थुकथं दु—

२०६८ कार्तिक १५ गते याःगु ७ बुँदाया सहमति पार्टीया निर्णय व जनताया भावनाया अःखः जूवंगु विषयया बारे जिमिसं कार्तिक १६ गते हे यानागु पत्रकार सम्मेलनपाखें थःपिनिगु धारणा सार्वजनिक याये धुनागु सकलसिनं स्यूगु हे खँ खः । विशेषतः सेना समायोजन सम्वन्धी सम्झौता सारतः जनमुक्ति सेनाया नितिं अपमानजनक व शान्ति विरोधी तकं जूगुलिं जिमिसं स्वाभिमानी जनमुक्ति सेनाया कमाण्डर नापं फुक्क योद्धातय्त अज्वःगु आत्मसमर्पणवादी प्रक्रियां पूर्ण रुपं ब्यागलं च्वनेत इनाप यानाच्वना ।