मुन नेवाःत मेरील्याण्डय्

नेवाः अर्गनाइजेशन अफ अमेरिकाया च्याक्वःगु दँमुज्या 'संस्कृति संरक्षण व चुनौति' धयागु मू खँचु लिसें मेरील्याण्डय् तःजिक क्वचाःगु दु । न्हिच्छि यंकं जूगु ज्याझ्वलय् मस्तय्गु ज्याझ्वः, समय्बजि, दँमुज्या, सहलह लिसें सांस्कृतिक ज्याझ्वः व बेलिभ्वय् नं जूगु खः ।

न्हिनय् निताः इलय् न्ह्याःगु ज्याझ्वलय् 'नेवाः - दि सिम्बोल अफ नेप्लिज कल्चर' मस्तय्गु वर्कशप जूगु खःसा वयां लिपा 'संस्कृति संरक्षण व चुनौति' विषयया सहलह मुँज्या जूगु खः । उगु मुज्याय् डा. दिना वांग्देल, शुशील ताम्राकार, डा. रोशन श्रेष्ठ, डा. महेश्वर वैद्य, डा. प्रज्वल जोशी व राजेन्द्र श्रेष्ठं नेवाः भाय् व संस्कृतिलिसे सम्वद्ध थीथी विषयस न्ववानादीगु खः ।

सनिलय् जूगु सांस्कृतिक ज्याझ्वलय् नेवाः अर्गनाइजेशन अफ अमेरिका ल्यांग्वेज सेन्टरय् नेवाः भाय् सयेका च्वंपिं मस्तसहित संजीप प्रधान, श्रीजन ताम्राकार, सरोज दत्ता, शरिश्मा अमात्य, विश्वम्भर प्रधान, प्रज्वल कर्माचार्य, विष्णु श्रेष्ठ, अनुपमा प्रसाईं, योग्यमान शाक्य आदि नां जाःपिं कलाकारतपाखें थीथी म्ये प्याखं आदि न्ह्यब्वःगु खः।

न्हिच्छि यंकया थीथी ज्याझ्वः तसकं उत्साहपूर्वक क्वचाःगु खँ अर्गनाइजेशनया नायः राजेश श्रेष्ठं नेपालमण्डलयात कनादीगु दु ।

More Stories Like this