विदेशी हस्तक्षेपया सम्भावना

कृष्ण प्रजापति
भारतीयतय्त विकास निर्माण नं याना बी धकाः समुद्र सिथंनिसें राजधानी दिल्लीइ थ्यंक लँ नं दयेका बिल। तर ब्रिटिसतय्सं बेलायतं हइगु ल्वाभः ल्ह्ययेत धकाःसा उगु लँ दयेका बिउगु जुयाच्वन।

वर्तमान भट्टराई सरकारं भारतीय लगानीयात स्वतन्त्र रुपं नेपालय् दुकायेगु थेज्याःगु सम्झौताय् हस्ताक्षर याना वये धुंकाः थीथी निकायं आः विदेशी हस्तक्षेप जुइफुगु सम्भावना खंकाच्वंगु दु। न्हापां आर्थिक व सांस्कृतिक पक्षय् हस्तक्षेप याये धुंकलकि थनया मू चीजय् हस्तक्षेप यायेत उलि थाकुइ मखु। आर्थिक जनजीवन स्यन वा नेपालीतय्गु आर्थिक अवस्था थौं स्वयां मभिना वन धाःसा सरकारं उकिया जिम्मेवारी कायेमाः। तप्यंक हे लगानी याकाः विदेशी पुँजी दुकायेगु सम्झौताय् हस्ताक्षर यायेधुंकाः अज्याःगु सम्भावना नं आः तीब्र रुपं न्ह्यःने वयाच्वंगु दु। सरकारं याःगु थ्व सम्झौता छगू ल्याखं छपलाः छपलाः यानाः नेपाली अर्थतन्त्रयात विदेशीया ल्हातय् त्वःता बीगु अराष्ट्रिय अभियान हे खः। अथे जुयाः नं थ्व इलय् बिप्पा सम्झौता धोखा खः धकाः सदनंनिसें सतक तकं सः थ्वयाच्वंगु दु। वास्तवय् साम्राज्यवादी व उपनिवेदशवादीतय्सं स्वइगु दाउ हे थज्याःगु खः। उमिसं छखे झीत ह्ययेकाः छु छु न याना बी थें च्वंकी। तर थनं हे उमिसं थःत माःगु चीज हसुरे याना यंकी। झी सचेत व संगठित जुइ मफुत धाःसा अज्याःगु जालय् लानाः दीर्घकालीन रुपं द्यापं फये मालेफु।
साम्राज्यवादीतय्गु चाल व नीतियात न्हापांनिसें दुवालाः स्वयेगु इलय् अज्याःगु हे चाकु क्यनाः भुजिं लायेगु प्रबृत्ति उमिके दुसुलाच्वंगु खनेदु। बृटिस सरकारं भारतय् हस्तक्षेप याःगु इलय् नं उपिं तप्यंक बन्दूक व बम हे ज्वनाः भारतय् दुहां वःपिं मखु। न्हापां ला थौंकन्हय् झीथाय् सिसाबुसा व उगुंथुगुं सामान मीत भारतीय मूलया मनूत नेपाः दुहां वः थें ब्रिटिशत नं भारतय् दुहां वंगु खः। लिपा उमिसं भारतीयतय्त विकास निर्माण नं याना बी धकाः समुद्र सिथंनिसें राजधानी दिल्लीइ थ्यंक लँ नं दयेका बिल। तर ब्रिटिसतय्सं ला बेलायतं हइगु थःपिनि ल्वाभः व मेमेगु ज्वलं दिल्ली तक ल्ह्ययेत धकाःसा उगु लँ दयेका बिउगु जुयाच्वन। भारतीयतय्सं इलय् हे उपिं ल्हातय् तराजु व म्हिचाय् बन्दूक ज्वनाः भारत प्रबेश जूपिं खः धइगु सीकेफुगु खःसा भारतयात उलि याकनं बेलायतं कब्जाय् तये मफइगु खइ। धन्य, महात्मा गान्धीया नेतृत्वय् न्ह्याःगु राष्ट्रिय स्वाधीनता संग्रामं बेलायतं भारतीय भूमि त्वःते वने माल।
थौं झीगु देय् नेपाः नं अज्याःगु हे स्थितिइ लानाच्वंगु दु। म्हिगः भारत छगू निरीह देय् जूगुलिं उमिसं थः शत्रुया प्रतिकार यानाः पितिनेगु हे जक ध्यान तःगु दु। आः उमिगु जनसंख्या अप्वःगु व बेलायतं थें हे जःलाखःला देय्या ग्वाहालि कयाः वा श्रोत साधनय् कब्जा मयायेकं थःगु राष्ट्रिय जीवन हे न्ह्याये मफइगु स्थिति खने दया वःगुलिं धमाधम छगू धुंकाः मेगु देशय् उमिसं थःपिनि हस्तक्षेप सुरु यानाच्वंगु दु। भूटानयात थम्हं धाःथें तयेत ताःलाःगु भारतीय नवउपनिवेशं आः नेपाःयात नं थम्हं धाःथे तयाः थनया जलश्रोत, प्राकृतिक सम्पदा व फुसा पशुपति, लुम्बिनी थेंज्याःगु सांस्कृतिक सम्पदाय् तकं ल्हाः तयेगु कुतः यानाच्वंगु दु। अथे जुयाः हे इलय् ब्यलय् बुद्ध बूगु लुम्बिनी भारतय् लाः धकाः नक्कली लुम्बिनी दयेकाः अःखः अःखः प्रचार नं यानाच्वंगु दु। थज्याःगु गैरजिम्मेवारीपूर्ण प्रचारयन्त्रयात निरुत्साहित यायेगु ज्या नेपाली पत्रकारिता लागां याये मफुत धाःसा कन्हय् झीगु देशय् बुद्ध बूगु मखुसें भारतय् बूगु धकाः इतिहास च्वकेत नं भारत ताःलायेफु। उकिं नं थज्याःगु आर्थिक व सांस्कृतिक हस्तक्षेपपाखें बचे जुइत झी नेपाःमि जनता सदां सचेत व संगठित जुयाच्वनेमाःगु खनेदु।
अर्थतन्त्र राष्ट्रया दुगःक्वँय् हे खः। अथे जुयाः अर्थतन्त्र बमलाःतले झीगु देश विकास जुइगु म्हो हे जक सम्भावना दु।
राष्ट्र सवल यायेत, राष्ट्रिय भावना ब्वलंकेत व थीथी कथंया राष्ट्रियता च्वन्ह्याइ कथंया गतिविधि न्ह्यज्याकेत नं झीसं न्हापां राष्ट्र व राष्ट्रियता प्रति सजग मनूतय् जमात तयार याना तयेमाः। साम्राज्यवादी व उपनिवेशवादी शक्तिं निरीह देश व निरीह देशया राष्ट्र प्रमुखत समूल नष्ट यानाच्वंगु थ्व इलय् तमाम पीडित जनता व पीडित राष्ट्रतय्सं साम्राज्यवाद, उपनिवेशवाद व नवउपनिवेदशवादी शक्तिया विरोध याये मफुत धाःसा छगू धुंकाः मेगु देशयात स्वाहा याना यंकीगु स्वाभाविक खः। आः नकतिनि हे जक लिबियाय् अमेरिकी साम्राज्यवादं याःगु आक्रमण व गद्दाफीया हत्या थ्वहे सिलसिला खः। थ्वयां न्ह्यः नं इराक,
इरान, अफगानिस्तान थेंज्याःगु स्वतन्त्र देशय् हस्तक्षेप यायेगु, कब्जा यायेगु व थःपिनि आर्थिक एवं सामरिक लाभ कायेगु ज्या अमेरिकी साम्राज्यवादी शक्तिं याना हे च्वंगु खः। बुलुहुँ बुलुहुँ विश्वय् शक्ति राष्ट्र कथं न्ह्यःने वयाच्वंगु चीनया स्वशासित क्षेत्र तिब्बतय् गडबडी यानाः चीनयात उथलपुथल यायेगु सोच अमेरिकां कयाच्वंगुलिं भारतयात थःगु ल्हातय् कयाः नेपाःया माध्यमं अन गडबड यायेगु तयारी यानाच्वंगु नं जुइफु।
साम्राज्यवादी व उपनिवेशवादी देय्तय्त हे हौसला बी कथं बिप्पा सन्धीइ हस्तक्षेप याना वःगु कारणं थौं झीगु देशय् अःपुक हे विदेशी हस्तक्षेप तच्वयेका यंकीगु खःला धइगु ग्याःचिकु धाःसा ब्वलनाच्वंगु दु। म्हिगः तक झी गोर्खाली बहादुर धायेकाः गौरबं धस्वानाच्वनापिं नेपाःमि जनता थौं पुँजीवाद हावी जुयाः पुँजीपति वर्गया हीत जुइ कथंया विधेयकत जक सदनय् पारित याना यंकीगु व नीति निर्माण लागाय् अज्याःपिं हे जक अप्वः थ्यनाच्वंगुलिं यानाः नं विदेशी लगानीया बैंकत नीस्वनेगु विधेयक सदनय् तयार यानाच्वंगु अवस्था दु। अर्थतन्त्र हे विदेशीया ल्हातय् लायेफुगु अज्याःगु ज्यायात पने मफुत व नेपाली वा स्वदेशी राष्ट्रिय ब्यापारीतय् हितय् ज्या यानाः क्यने मफुत धाःसा थौं मखुसा कन्हय् झीगु पतन जुइफु। अथे जुयाः नं निहित स्वार्थया लागिं जक मखुसें राष्ट्र व राष्ट्रियता बल्लाकेगु खँय् नं ध्यान तयाः राजनीतिक नेता कार्यकर्ता व सचेत जनतां थःपिनि पलाः न्ह्याकेमाःगु ई वयेधुंकूगु दु।

More Stories Like this