आकाझाकां आलोचित प्रधानमन्त्री भट्टराई

सरकार गठन यायेवं चर्चित जुयाः सकस्यां आशा कायेबहःम्ह धकाः भलसा काःम्ह प्रधानमन्त्री डा. बाबुराम भट्टराई लिपांगु इलय् वयाः थम्हं याःगु छुं अलोकप्रिय ज्याया कारणं आलोचित जुयादीगु दु। नेपालय् दयेकूगु मुस्ताङ गाडी गयाः चर्चाय् वःम्ह वय्कः थौंकन्हय् सभासद् बालकृष्ण ढुंगेलयात माफी बीगु लागिं
राष्ट्रपतियात याःगु सिफारिसया कारणं विवादय् वःगु दुसा थ्वहे इलय् ४९ म्ह मन्त्री दुथ्याःगु सरकार गठन यानाः झन् हे आलोचित जुयादीगु दु। थ्व वास्तवय् वय्कलं सरकार गठन याःबलय् एजेण्डाय् लाःगु विषय मखु। तर दथुइ वःगु थ्व प्रकरणतय्त विपक्षी पार्टीतय्सं थुभनं चर्के याना बिल कि उकिं यानाः वय्कलं यानादीगु बांलाःगु ज्याखँत नं ध्याकुनय् लाः वन। स्वम्ह प्रधानमन्त्रीतय्सं ज्यंके मफुगु सेना समायोजनया ज्यायात वय्कलं समाधान यानादिल। दिनाच्वंगु संविधान च्वज्या न्ह्याइगु बांलाःगु संकेत नं वय्कलं क्यनादिल। तर जम्बो मन्त्रिपरिषद् व ढुंगेलया आममाफीं वय्कःया सम्पूर्ण सकारात्मक ज्यायात ध्याकुनय् लाकाः वय्कःया छबीयात समेत संकटय् लाका बिउगु दु। उकिया नापं न्हय्गू बुँदाया शान्ति सम्झौता लिपा राष्ट्रिय सरकार गठन यायेत वय्कलं राजीनामा बीमाःगु धकाः खँ वयाच्वंसां उकियात अस्वीकार यासें वय्कलं थःगु हे नेतृत्वय् राष्ट्रिय सरकार गठन जुइ धकाः दावी यानादीगु कारणं नं विपक्षी पार्टीत वय्कः खनाः तम्वयाच्वंगु दु। वास्तवय् विपक्षी राजनीतिक दलतय्सं वय्कःया विरुद्ध थुकथं अभियान हे सञ्चालन याना हःगुया छता मू कारण थ्व नं खः। प्रधानमन्त्री भट्टराईनं आः जुयाच्वंगु विरोधया लिउने सुलाच्वंगु थ्व कारणयात नं थुइकेमाः।

More Stories Like this