विज्ञ पुचः बारे नेवाः धापू

थौंकन्हय् चर्चित राज्य पुनर्संरचना सम्बन्धी विज्ञ समूहया गठनयात कयाः नेवाः स्वायत्त राज्य मंकाः संघर्ष समितिपाखें संविधानसभाया अध्यक्ष सुभाष नेम्बाङयात लःल्हाःगु ज्ञापनपौ
सम्माननीय सुवास नेम्वाङ्गजु,
अध्यक्ष, संविधानसभा।
मू राजनीतिक दलतय् दथुइ नकतिनि शान्ति प्रक्रिया व संविधान निर्माणया सम्बन्धय् जूगु न्हय्गू बुँदाया राजनीतिक सहमतिया कार्यान्वयनया झ्वलय् नेपाःया अन्तरिम संविधान-२०६८ या झिंछक्वःगु संशोधन यानाः राज्य पुनर्संरचना, श्रोत व अधिकार बाँडफाँडया सम्बन्धय् सभापाखें छगू विज्ञ समिति दयेकेगु तयारी जुयाच्वंगु इलय् जिपिं समग्र नेवाः समुदायया गम्भीर ध्यानाकर्षण जूगु दु। थुगु नेवाः स्वायत्त राज्य मंकाः संघर्ष समितिया माध्यमं तत्सम्बन्धय् जिपिं नेवाः समुदायया क्वय् न्ह्यथना कथंया मंकाः सरोकारया न्ह्यसः थुगु ज्ञापन पौपाखें छिगु न्ह्यःने न्ह्यब्वयाच्वना। लिसें उचित संबोधनया अपेक्षा नं यानाच्वना।
जिमिगु सरोकार:
समितिया संरचना
विज्ञपिनिगु छनोटय् प्राविधिक ज्ञानया अतिरिक्त नेवाः लगायत आदिवासी जनजाति समुदायया आन्दोलनकारी संस्थाया सिफारिसयात समेत आधार दयेकेमाः,
मिसा लगायत उत्पीडित समुदायया समानुपातिक समावेशी दयेमाः,
जातीय स्वायत्तता, स्वशासन, संघीयता व गणतन्त्र विरोधीतय्त गुगुं नं कथंया थाय् मबीमाः,
समितिया समायावधि:
क्वःछिनातःगु इलय् हे संविधानया न्हापांगु मस्यौदा न्ह्यब्वये माःगुलिं समितिया समयावधि फक्व चीहाकः यायेमाः।
समितिया कार्यक्षेत्र:
राज्य पुनर्संरचना समितिं सर्वसम्मतिं तयार याःगु प्रदेश निर्माणया मू निगू आधार (क) पहिचान, (ख) सामर्थ्यया सिद्धान्त दुने च्वनाः तयार याःगु प्रस्तावित प्रदेशया सीमाङ्कनय् खने दुगु प्राविधिक कमी कमजोरी भिंकेगु, केन्द्र व प्रदेशया राजधानी क्वःछीगु, श्रोत व अधिकार गुकथं बाँडफाँड यायेगु धइगु सम्बन्धय् जक सुझाव बीगु,
प्रदेश प्रदेशया दथुइ श्रोत व अधिकारया सम्बन्धय् ब्वलंगु समस्या समाधानया उपाय व संयन्त्र निर्माण,
अवशिष्ट अधिकारया प्रयोग
समितिया कार्य विधि:
विज्ञ समितिं प्राप्त जूगु सुझाव राज्य पुनर्संरचना, स्रोत व अधिकार बाँडफाँड समितिया अनुमोदन कयाः जक संविधानसभाया पूर्ण बैठकय् न्ह्यब्वयेगु,
संविधानसभां नियुक्त जूपिं विज्ञपिनिगु समितिया कार्यक्षेत्र संविधानसभा अन्तर्गत सार्वभौम समितिया समानान्तर भूमिका म्हितेगु कथं मजुसे सुझाव व ग्वाहालि यायेगु परिधि तक जक सीमित जुइमाः।
आशा दु, जिपिं फुक्व नेवाः समुदायया मंकाः आकांक्षा व भावनाया कदर जुइ। विज्ञ समितिया गठन विशेषतः राज्य पुनर्संरचनाया सम्बन्धय् आःतक न्ह्यायेधुंकूगु कुतःयात अःखः लिच्वः लाकेगु तातुनाः जुयाच्वंगु राजनीतिक चेष्टा जकं मखु ला धइगु आम जनमानसय् ब्वलनाच्वंगु आशंकाया पृष्ठभूमिइ छिगु नेतृत्वय् दुगु संविधानसभां जिपिं नेवाःतय्सं ल्ह्वनागु उपरोक्त सरोकारया मुद्दायात गम्भीर रुपं ग्रहण यासें कार्यान्वयन यायेगु नं आवश्यक जूगु खँ न्ह्यथनाच्वना। मखुसा न्हूगु परिस्थितिइ न्हू कथंया द्वन्द्वया श्रृजना जुइगु व जनतां बाध्य जुयाः हाकनं संघर्षया लँ ल्यये मालीगु नं जुइफु। थुकी सम्माननीय अध्यक्षजुं नेतृत्वदायी व समन्वयकारी भूमिकाया अपेक्षा यानाच्वना। सुभाय् !

More Stories Like this