१४ गते जःखः जिगु हे राष्ट्रिय सरकार: प्रम

येँ(सन्ध्या टाइम्स)/प्रधानमन्त्री डा.बाबुराम भट्टराईनं ७ बुँदाया सहमति कार्यान्वयन यायां मंसिर १४ गते जःखः थःगु हे नेतृत्वय् राष्ट्रिय सहमतिया सरकार गठन जुइगु दावी यानादीगु दु।
प्रधानमन्त्री निवास बालुवाटारय् थौं सुथय् संचारकर्मीतलिसे खँ ल्हासें प्रम भट्टराईं थ्व दावी यानादीगु खः। वय्कलं कांग्रेस व एमाले नं थःगु हे नेतृत्वया सरकारय् वइगु दावी नं यानादिल। शान्ति व संविधान थःगु मू कार्यभार खः धासें न्यादँ तक दिनाच्वंगु शान्ति प्रक्रिया थःगु कार्यकालय् न्ह्याः वंगुलिं उकियात पूवंकेत व्यक्तिगत छवि दाउलय् तयाः लिपांगु इलय् मन्त्रिमण्डल विस्तार यानागु खँ नं वय्कलं स्पष्ट यानादिल।
संसदय् दुथ्याःपिं १० प्रतिशत तक सभासद्यात मन्त्री दयेके जिउगु अन्तर्राष्ट्रिय प्रचलन दुगु खँ कँसें वय्कलं मन्त्रिमण्डलया आकार तःधं मजूगु जिकिर नं यानादिल। थः म्होतिं नं २० म्हेसिया मन्त्रिमण्डल दयेकेगु सोचय् दुगु खःसां परिस्थितिया बाध्यतां यानाः मन्त्रीत थपे यायेमाःगु खँ नं वय्कलं कनादिल। मधेसी मोर्चां वंगु भदौ महिनाय् हे राज्य मन्त्रीतय्गु धलः लःल्हाःगु जूसां थम्हं निला तक जबर्जस्ती दिकागु खँ न्ह्यथँसें जातीय, क्षेत्रीय नापं लैंगिक सन्तुलन यायेगु नितिं मन्त्रिमण्डल तःधं यायेमाःगु तर्क तयादिल।
दलतय्गु दथुइ जूगु ७ बुँदाया सहमति याकेगु नितिं प्रधानमन्त्रीया हैसियतं थम्हं नं प्रत्यक्ष रुपं योगदान यानागु दु धासें वय्कलं चाःहिकाः उकिया जस मदुगु गुनासो नं यानादिल। कांग्रेस-एमालें व मधेसी मोर्चालिसे गठबन्धन यानाः यकःति कथं वनीन धकाः ग्यानाः हे मन्त्रिमण्डल विस्तार व सभासद् बालकृष्ण ढुंगेल प्रकरणयात ल्ह्वनेगु ज्या यानाच्वंगु द्वपं नं वय्कलं बियादिल। तर थः यकःति वनेगु सोच मदु धासें वय्कलं मन्त्रिपरिषद्या सुं नं दुजः भ्रष्टचारय् लगे जुल धाःसा वयात तत्काल पदं बर्खास्त यायेगु ख्याच्वः नं बियादिल।