झलनाथया किजा निलम्बित

येँ(सन्ध्या टाइम्स)/थौं सुथय् च्वंगु मन्त्रिपरिषद्या बैठकं अनियमित ज्या याःगु द्वपं फये मालाच्वंम्ह समाज कल्याण परिषद्या उपाध्यक्ष दाताराम खनाल, कोषाध्यक्ष रत्नबहादुर गाहा मगर व सदस्य सचिव छेवाङ नाङ्गेल लामायात मेगु आदेश मवःतलेया निंतिं निलम्बन याःगु दु।
मन्त्रिपरिषद्या थौंया मुँज्यां उगु निर्णय याःगु जानकारी सरकारया प्रवक्ता नारायणकाजी श्रेष्ठ प्रकाशं बियादीगु दु। आःया निंतिं महिला, बालबालिका नापं समाज कल्याण मन्त्रालयया सहसचिवयात समाज कल्याण परिषद्या सदस्य सचिवया रुपय् ज्या यायेत निर्देशन नं बिउगु दु।
२०६३ सालय् लोकतान्त्रिक आन्दोलन लिपा दयेकूगु गिरिजाप्रसाद कोइरालाया नेतृत्वय् दुगु सरकारं झलनाथ खनालया किजा दाताराम खनालयात समाज कल्याण परिषद्या उपाध्यक्ष नियुक्त याःगु खः। अथे हे मन्त्रिपरिषद्या बैठकं शिक्षा सेवा आयोगया अध्यक्षय् पुलांम्ह सचिव उदयराज सोतीयात नियुक्त यायेगु नं निर्णय याःगु दु।
खुला प्रतिस्पर्धापाखें ल्यःम्ह विद्युत प्राधिकरणया कार्यकारी निर्देशक दीपेन्द्रनाथ शर्मां बियादीगु राजीनामा स्वीकृत यानाः हाकनं खुल्ला प्रतिस्पर्धां हे मेम्ह कार्यकारी निर्देशक ल्ययेगु नितिं उर्जा मन्त्रालययात निर्देशन बिउगु दु। विद्युत प्राधिकरण दुने प्यखेरं असहयोग जूगुलिं च्वने मफयाः शर्मां राजीनामा बिउगु खः।
आवंलि वासः खर्च तप्यंक हे अस्पतालयात
मन्त्रिपरिषद्या थौं च्वंगु बैठकं आर्थिक सहायता कार्याविधि संशोधन यासें आवंलि सुयातं उपचार खर्च बी माल धाःसा व्यक्तिया ल्हातय् मबिसे तप्यंक हे अस्पतालयात बीगु निर्णय याःगु दु।
आवंलि विशिष्ट मनूतय्त बीगु याना वयाच्वंगु वासः खर्च बीबलय् उकिया औचित्य पुष्टि यायेमाःगु व उकिया जानकारी तत्काल सार्वजनिक यायेगु व उपचार खर्च नं व्यक्तियात मबिसे बिल बमोजिम तप्यंक हे अस्पतालयात भुक्तानी यायेगु निर्णय याःगु खः।
अथे हे विदेशय् उपचार यायेमाःगु प्रशंगय् धाःसा नेपाली नियोग मार्फत् सम्बन्धित अस्पतालयात हे खर्च भुक्तानी याइगु जूगु दु। सभासद्तय्त विशेष उपचार यायेमाल धाःसा समितिया सिफारिस कथं यायेगु नं निर्णय याःगु दु।