थप स्वंगू असहमतिया बुँदा न्ह्यब्वल

येँ (झीगु स्वनिगः)


एकीकृत नेकपा -माओवादी)या म्हिगः सोमवाः च्वंगु केन्द्रीय कमिटीया मुँज्याय् बरिष्ठ नेता मोहन बैद्य किरणं न्हापा हे सार्वजनिक जुइ धुंकूगु झिगू अले थप स्वंगू यानाः झिंस्वंगू असहमतिया बुँदा न्ह्यब्वयादीगु खः । एकीकृत माओवादीया बरिष्ठ न्वकु किरणं मुँज्याय् असहमतिया थप स्वंगू बुँदा न्ह्यब्वयेगु झ्वलय् स्वंगू दलया शीर्ष नेतात एकीकृत माओवादीया नायः प्रचण्ड, कांग्रेसया सभापति सुशील कोइराला, एमालेया नायः झलनाथ खनाल नापं मधेसी मोर्चाया विजय गच्छेदार शीर्ष च्वनाः गुगु कथं ७ बुँदाया सहमति यात उकिइ राज्य पुनर्संरचनाया सवालय् विज्ञ पुचः दयेकेगु धकाः न्ह्यथंगु संविधानसभाया राज्य पुनर्संरचना नापं राज्य शक्ति बाँडफाँट समितिपाखें तयार याःगु नेवाः स्वायत्त प्रदेश नापं १४ प्रदेशया प्रस्तावयात ध्वस्त यायेत, संघीयतायात ध्वस्त यायेत अथे विज्ञ पुचः दयेकेगु धकाः सहमति याःगुयात गुगु नं हालतय् स्वीकार याये फैमखु धकाः धयादीगु खः ।

अन्तरिम संविधानय् आयोग दयेकेगु धकाः न्ह्यथनातःगु थासय् आः जन निर्वाचित संस्थासिबें नं शक्तिशाली यायेत विज्ञ पुचः दयेकेगु धकाः गुगु कथं संवैधानिक अंगया रुपय् यंकेत सहमति यात थ्व राज्यं बहिस्करणय् लाकातःपिं समुदाय नापं नेपाःमिपिनिगु भावनाया अःखः खः धकाः नं नेता किरणं धयादिल । अथे हे मेगु असहमतिया बुँदा धैगु विस्तृत शान्ति सम्झौता कथं द्वन्द्वकालया फुक्क मुद्दा खारेज यायेमाःगु खःसां ७ बुँदाया सम्झौताय् उकियात उल्लेख मयासे माओवादीया सभासद् बालकृष्ण ढुंगेलया मुद्दा लित कायेगु धकाः सरकारं गुगु कथं निर्णय यात उकिंयानाः ज्यामछिंगु अवस्था वःगु नाप नापं आः द्वन्द्व कालया फुक्क मुद्दा लितकायेमाः धकाः न्ह्यथनातःगु दु । उगु हे कथं मेगु बुँदाय् पार्टीया नायः जुयाः नं पुष्पकमल दाहाल प्रचण्ड एनजीओ व आइएनजीओ चले यायेथें लुम्विनीया नितिं ध्यबा फ्वनेत विदेशय् वनाजूगु, उकिंया पार्टीया मुँज्या तकं च्वने मफूगु, देय्या समस्या समाधान यायेगुलिइ गम्भीर मजूगु खँ नं न्ह्यथनाः आपत्ति नं प्वंकूगु दु ।

पार्टीया निर्णयया विरुद्ध गुगु कथं नेतृत्वं सम्झौता यानाः वनाच्वन थ्व धैगु मन्द विष 'स्लो प्वाइजन' नकाः सुधारवादी व दक्षिणपन्थि धारपाखे पार्टीयात यंकेत कुतः यानाच्वंगु दु धकाः बरिष्ठ न्वकु मोहन बैद्य किरणं तसकं आपत्ति प्वंकादीगु दु । एकीकृत माओवादीया केन्द्रीय कमिटीया मेगु मुँज्या थौं मंगलवाः पार्टीया केन्द्रीय ज्याकू पेरिसडाँडाय् च्वनीगु जूगु दु । केन्द्रीय कमिटीया मुँज्याय् फुक्क धैथें केन्द्रीय दुजःतय्सं थःथःगु खँ तइतिनिगु जुयाः थुगुसीया केन्द्रीय कमिटीया मुँज्या ताः हाकः जुइगु अवस्था दु ।