इलय् हे माःगु ज्या मयाःगुया लिच्वः

माओवादी सभासद् बालकृष्ण ढुंगेलं जनयुद्धकालय् उज्जनकुमार श्रेष्ठयात स्याःगु सवालय् सर्वोच्च अदालतं बिउगु सजायया फैसला लित कायेमाः धकाः सरकारं राष्ट्रपतियात याःगु सिफारिस विवादय् लानाच्वंगु इलय् लाक्क माओवादीया हे मेम्ह सभासद् (आः राज्य मन्त्री) सूर्यमान दोङं नं मनू स्याःगु दु धइगु मेगु मुद्दा थना हयेत स्वयाच्वंगु खनेदु। खतुं माओवादी नेतातय्सं जनयुद्धया इलय् याःगु ज्यायात थुकथं हे वात्तुवालाः वनेगु खःसा सुं छम्ह हे बचे जुइगु स्थिति जुइ मखु। न थौंकन्हय् नेपाली सेना व प्रहरीया उच्च पदय् च्वनाच्वंपिं पदाधिकारीत हे बचे जुइ खनी। अथे खयां नं माओवादीया विगतया ज्याखँयात कयाः थथे खँ पिहां वयाच्वंगुया मू कारण धइगु अन्तरिम संविधानय् व्यवस्था यानातः थें सत्य निरुपण तथा मेलमिलाप आयोग गठन मयाःगुलिं हे खः। अन्तरिम संविधानय् व्यवस्था यानातः थें राज्य पुनर्संरचना आयोग गठन मयाःगुलिं थौंकन्हय् राज्य पुनर्संरचना यायेत विज्ञ समूह दयेकेगु लाकि छु यायेगु धकाः गुगु समस्या पिहां वःगु खः पाय्छि उकथं हे सत्य निरुपण आयोग गठन मयाःगुलिं सभासद् बालकृष्ण ढुंगेलया थ्व समस्या पिहां वःगु खः। थज्याःगु समस्या धइगु उगु आयोगं स्वयाः मिले याना छ्वइगु खः। तर संविधानसभाया चुनाव क्वचासांनिसें हे सत्ता समीकरणय् तक्यं वंपिं पार्टी व उकिया नेतातय्गु गैरजिम्मेवारी पहलं यानाः थौं थुज्वःगु समस्यात पिहां वयाच्वन। उकिं थुज्वःगु आयोग गठन यायेगु ज्याय् आः नं ई दनि, माःगु पलाः न्ह्याका वन धाःसा दथुइ वइगु समस्यात ज्यंका वने फइ। मखुसा थुज्वःगु समस्या पलाः पतिकं वयां तुं च्वनी।

More Stories Like this