प्रधानमन्त्रीया नेवाः भासं संवोधन

शान्तरत्न शाक्य

नेपाल संवत् ११३२ न्हूदँया लसताय् चकं दबुली ग्वसाः ग्वःगु न्हूदँ ज्याझ्वलय् प्रधानमन्त्री बाबुराम भट्टराइजुं थःगु मन्तुना नेपालभाषा प्वंकादीगुलिं 'नेपाल संवत्' नेवाःतय्गु जक जुल धकाः राजेन मानन्धरजुं ११३२ कछलाथ्व ७ या 'सन्ध्या टाइम्स'य् च्वयादीगु च्वसुयात रोमाञ्चक च्वसु धकाः अति च्वछासें यलया शाक्य सुरेनजुं 'प्रधानमन्त्रीया न्हूदँया सन्देश बारे छता निता तँसा खँ' धकाः च्वयादीगु ब्वने खन।
शाक्यजुया हथासं पिहांवःगु च्वसु 'तँसा खँ' य् दः छु ताल धाःसा प्रधानमन्त्री बाबुराम भट्टराइजुं नेपालभाषां न्ववानाः नेपाल संवत्यात नेवाःतय्गु जक संवत् याना बिल धइगु एकाङ्की बिचाःयात ज्वनाः पिलू वःम्ह राजेनजुयात अःखः सिमा गयेकेगु ज्या यात। थ्व प्रतिगामी बिचाः खः। थुज्वःगु विचालय् सहमति क्यनेगु हे खःसा शाक्य सुरेनजुं राजेनजुं ल्ह्वंगु डा. बाबुराम भट्टराइजुं न्ववानादीगु भाय्यात 'ससःभाय्' अर्थात 'सुसुराली भाषा' धाःगुली छाय् मौन च्वनेमाःगु? थुकी नं लां जः ह्वलेमाःगु मखु ला? शाक्य सुरेनजुया विवेक बुद्धि गन ल्हानाच्वन?
गथे नेपाल संवत्यात राष्ट्रिय संवत् खः धकाः स्वंगू दशक न्ह्यवंनिसें धया वयाच्वनागु, हाला वयाच्वनागु, न्यंका वयाच्वनागु, च्वया वयाच्वनागु भाय् डा. बाबुराम भट्टराईया ससः भाय् खःला? खःसा खः धकाः शाक्य सुरेनं सही छाप याये माल कि नेपालभाषा धइगुया नेपालय् अस्तित्व हे मदु। मखुला धइगु खःसा जीवित नेवाः, जीवित नेपालभाषायात 'ससःभाय्' धकाः अवमूल्यन, अनादर याःगु गुगु मेडिया खः च्वमि खः वया उपरे सर्वोच्चय् रीट निवेदन तयाः दोषीयात हद थ्यंकया सजाया वा नसिहत बी मालताकि कन्हय् मेपिं प्रतिगामी शक्तितय्सं छ्यं ल्ह्वने मफयेमा। नेपालभाषा, नेपाल संवत्, नेपाःया निधि खः। नेपाःया राष्ट्रियता खः। नेपाल राष्ट्रया खः धकाः धायेके माल।
६२/६३ या हिउपालं नेपाःयात गुगु थासय् ससम्मान थनेगु, धस्वाकेगु ज्या यात उकिया लिच्वलं नेपाःया दक्व भाय्यात राष्ट्र भाषाया दर्जा बीधुंकूगुली राजेन मानन्धर थेंज्याःम्ह च्वमिया असमझदारीयात च्वछायाः प्रधानमन्त्री डा. बाबुराम भट्टराइजुया सम्मानजनक अभिव्यक्ति नेपालभाषा जुइमा वा मैथिली भाषा, तामाङ, गुरुङ, मगर, मधेसी न्ह्यागु हे भासं न्ववाःगु जूसां व नेपाःया भाय् खः। नेपाली भाय् खः।
मानववादी नेता राष्ट्रिय न्हूदँ समारोहया नायः भाजु पद्मरत्न तुलाधरजुं पाय्छि हे न्ववानादिल धकाः शाक्य सुरेनं थःगु च्वसुइ न्ह्यथनातःगु खँपु गथे खः अथे हे न्ह्यथनाच्वना �'झी प्रधानमन्त्री फुकसिया प्रधानमन्त्री खःसा फुक्क जातया भाषायागु मन तयाबी माल। ऐतिहासिक कथं प्रधानमन्त्री डा. बाबुराम भट्टराइजुया पालय् नेवाःतय्गु मन तयेगु ज्या जुल, नेवाः भासं भिंतुना सन्देश बियाः। न्हूगु नेपालय् झीसं चाहना यानाच्वनागु छता खँ थ्व नं मखुला?
पद्रत्नजुया सुन्दर शान्त ऐतिहासिक छ्यातायात सरल व सहजकथं प्रधानमन्त्री बाबुराम भट्टराईजुं छुं न्हि लिपा धनुषाया छगू ज्याझ्वलय् 'मैथिली भासं' न्ववानादिल डा. भट्टराईजुं थः दक्व नेपाःमिया प्रधानमन्त्री खः धकाः। थन न्ह्यसः दनी मैथिली भाषा डा. बाबुराम भट्टराईजुया ससःमांया भाय् कि छु भाय्? नेपालभाषायात 'ससः भाय्' धकाः क्षुद्र बिचाः तइपिं मेडियातय्सं स्पष्ट याये माल मखुला?
अन्तय् डा. बाबुराम भट्टराईजुयात नेपालभाषां न्ववायेत हःपा, हौसला, सन्तुष्ट यायेत ताःलानादीपिं प्रधानमन्त्रीया तिरिमय्जु हिसिला यमि व महान्याधिवक्ता मुक्ति प्रधानपिंत सुविनित सुभाय् ! व हार्दिक बधाई देछायाच्वना।

More Stories Like this