नेवाः कलाकःमि दबू नीस्वन

येँ(सन्ध्या टाइम्स)/नेवाः देय् दबूया भातृ संगठन कथं नेवाः कलाकःमि दबू तदर्थ समिति नीस्वंगु दु। नकतिनि जूगु नेवाः कलाकारतय् छगू मुँज्यां नेवाः कलाकःमितय् उगु संस्था स्वंगु खः।
नेपाल नाट्यकला प्रतिष्ठानया प्राज्ञ रामकृष्ण दुवाल नायः जुयादीगु नेवाः कलाकःमि दबूया ज्यासना पुचलय् शेषनारायण महर्जन व सविता मुनिकार न्वकु कथं च्वनादीगु दु। अथेहे छ्यांज्ये पदय् पवित्र कसाः च्वनादीगु दु। लिउ छ्यांज्ये सुलिन्द्र शाक्य च्वनादीगु दुसा दांभरि पदय् रेवन्तलाल श्रेष्ठ च्वनादीगु दु।
ज्यासना पुचः तदर्थ समितिया दुजलय् न्हुछेराजा मुनिकार, गोविन्द ह्यूमत, सूर्यनारायण महर्जन, सुदनमान मुनिकार व किरण महर्जन च्वनादीगु दु।
नेवाः कलाकारतय् बाजं, म्येँ, प्याखं व थीथी विधायात निरन्तर रुपं विश्वया न्ह्यःने धस्वाका तयेगु ताः तयाः थुगु समितिं हरेक प्याखं, म्येँ व बाजंयात लिपिवद्ध यायेगु ज्या न्ह्याकेत्यंगु दु।