न्हूदँया तुच्चा नापं ज्याथजिथि हना

येँ(सन्ध्या टाइम्स)/ने.सं. ११३२ न्हूदँ क्यंगु लसताय् येँ मनपा १३ वडाया ज्याथपिं नागरिकपिंत हना नापं तुच्चा ज्याझ्वः जुल।
नेपाल लोकतान्त्रिक नेवाः संघया ग्वसालय् जूगु उगु ज्याझ्वलय् पुलांम्ह प्रधानमन्त्री लिसें नेकपा (एमाले) या अध्यक्ष झलनाथ खनाल मूपाहां कथं झाःगु खः। ज्याझ्वलय् १३ वडाय् च्वनाच्वंपिं न्हय्न्हय्दँ पुलेधुंकूपिं सछिम्ह ज्याथजिथिपिंत हनेगु ज्या जूगु खः। अथे हे १३ वडाय् हे निजी श्रोतपाखें वृद्धाश्रम चायेकाः हाःनाः मदुपिं जिथिपिं मिसापिनि सेवा याना वया च्वनादीम्ह दिलशोभा श्रेष्ठयात नं उगु हे ज्यझ्वलय् हनेज्या जूगु खः।
ज्याझ्वलय् न्ववासें एमाले अध्यक्ष खनालं थुज्वःगु ज्याझ्वः त्वाः त्वालय् हे सञ्चालन जुइमाःगु बिचाः प्वंकादिल।
ग्वसाः खलःया नायः विजय मानन्धरया सभापतित्वय् जूगु उगु ज्याझ्वलय् ग्वसाः खलःया न्वकु बसन्तलाल श्रेष्ठं लसकुस यानादीगु खः। ज्याझ्वलय् लोकतान्त्रिक नेवाः संघया नायः केबी घजु लिसें थीथी वक्तातय्सं नं न्ववानादीगु खः।
ज्याझ्वःया लिपांगु ब्वय् थीथी सांस्कृतिक ब्वज्या नं जूगु खः।