आदेशया सम्मान यायेत राष्ट्रपतिया सुझाव
येँ(सन्ध्या टाइम्स)/राष्ट्रपति डा.रामवरण यादवं सभासद् बालकृष्ण ढुंगेलया बारे सर्वोच्च अदालतपाखें जूगु फैसला व आदेशयात सम्मान यायेत प्रधानमन्त्री डा. बाबुराम भट्टराईयात सुझाव बियादीगु दु।
थौं सुथय् शीतल निवासय् थःत नापलाः वःम्ह प्रधानमन्त्री भट्टराईयात राष्ट्रपतिं थ्व सुझाव बियादीगु खः। कानुनी शासनय् सर्वोच्च अदालतया फैसला हे अन्तिम जुइगुलिं उकियात सम्मान यायेत राष्ट्रपतिं बः बियादीगु खः।
उगु इलय् प्रधानमन्त्रीं मालदिभ्सय् जूगु १७ क्वःगु सार्क शिखर सम्मेलन व सम्मेलनं याःगु निर्णयया बारे राष्ट्रपतियात ब्रिफिङ्ग यानादीगु खः।
भेटवार्ताया झ्वलय् ७ बुँदाया सहमति लिपा शान्ति प्रक्रिया व संविधान च्वयेगु ज्याय् नं प्रगति व सहमति कार्यान्वयन कायेमाःगु खँय् नं सहलह जूगु खः।
थौं स्वंगू दलया शीर्ष बैठक
थ्वहे दथुइ प्रम भट्टराईनं सभासद् ढुंगेलयात आम माफी बीत सरकारं सिफारिस याःगु नापं लिपांगु इलय् सर्वोच्च अदालतं बिउगु आदेशयात कयाः छु यायेगु धइगु खँय् सहलह ब्याकेत स्वंगू दलया शीर्ष नेतातय्गु बैठक सःतादीगु दु।
थौं सनिलय् च्वनीगु उगु बैठकय् माओवादी, कांग्रेस, एमाले नापं मधेसी मोर्चाया नं शीर्ष नेतातय्सं ब्वति काइ धाःगु दु। प्रधानमन्त्री भट्टराईनं सरकारया निर्णययात कयाः सहमति ब्वलंकेत उगु बैठक सःतादीगु खः।
